༄༅། །བོད་ལྗོངས་ལྷ་མི་ཡོངས་ཀྱིས་དད་མོས་རྩེ་གཅིག་གིས་ལུགས་གཉིས་ཀྱི་འདྲེན་པ་མཆོག་ཏུ་མངའ་གསོལ་བ། ཐམས་ཅད་མཁྱེན་པ་རྡོ་རྗེ་འཆང་རྒྱ་མཚོའི་བླ་མ་ཆེན་པོའི་ཕྱག་ཐམ།

སེམས་འཚོར་དམར་པོ།

སེམས་འཚོར་དམར་པོ།
འདས་པའི་ལོ་ཟླ་སྐད་གཅིག་སྐད་ཅིག་གིས་བུད་ཐལ།།ད་ལྟའི་ཉིན་ཞག་ག་ལེ་ག་ལེ་ལ་འགྲོ་གིན།།མ་འོངས་ནམ་ཟླ་རིམ་གྱིས་རིམ་གྱིས་རང་འཛད་ནས།།མི་རྟག་སྒྱུ་མའི་རང་གཤིས་མི་ཚེ་འདི་རྫོགས་འགྲོ།།ཆུང་དུས་རྩེད་ར་འགྲིམས་པའི་སྤྲོ་སྣང་དེ་མ་ཐོབ།།གཞོན་དུས་ཆུང་མ་བསུས་ནས་ཁྱིམ་གཞིས་ཀྱང་མ་བཟུང༌།།རྒས་དུས་རེ་ལྟོས་བཅོལ་ས་བུ་ཚ་ཞིག་མེད་པར།།མི་རྟག་སྒྱུ་མའི་ལུས་འདི་རྨི་ལམ་བཞིན་རྫོགས་སོང༌།།ཆུང་དུས་ཐོས་པ་བསགས་པའི་སློབ་སྦྱོང་གི་འབྲས་བུ།།སྒོམ་ནས་རྒྱུད་ལ་སྦྱར་བའི་ཉམས་ལེན་ཙམ་མེད་པར།།ཁ་བཤད་ཆུ་ཡི་ལྦུ་བས་དུས་ཚོད་ཀུན་བསྐྱལ་ནས།།མི་རྟག་སྒྱུ་མའི་ལུས་འདི་སྟོང་པ་རང་ཆགས་སོང༌།།

ཟིན་བྲིས་རྣམས་གྲངས།

དྲང་སྲོང་རྒན་པོའི་ལྟ་གྲུབ།

ཆར་དང་ཉི་ཟེར་འཐབ་པའི་དབྱར་གཞུང་ན།།སྣ་ལྔའི་ཁ་དོག་འཁྱིལ་བའི་འཇའ་རིས་སྣེ།།སུ་དང་གང་གིས་འཇུ་ཡང་མི་ཟིན་པ།།བདེན་པའི་གནས་ལུགས་བསྟན་པའི་མཚོན་གཞི་ཞིག།
ཁ་རྩངས་གྲང་ལྷག་འཐབ་ནས་ཁ་བ་འབབ།།དེ་རིང་གཡའ་དག་མཁའ་ནས་ཉི་གཞོན་འཛུམ།།གནམ་སའི་གཤིས་ལུགས་ངེས་མེད་འགྱུར་བ་འདི།།འདུས་བྱས་མི་རྟག་མཚོན་པའི་དཔང་རྟགས་ཤིག།
འཕར་སྤྱང་ཝ་མོ་ཚོགས་པའི་དུར་ཁྲོད་དུ།།རྣམ་ཤེས་རླུང་གིས་ཁྱེར་བའི་མཛེས་མའི་ལུས།།གོས་མེད་གཅེར་བུར་ལུས་པའི་མགྲོན་སྟོན་འདིས།།དྲང་སྲོང་རྒན་པོའི་ཞལ་ལ་བདེན་ཁ་སྦྱིན།།
བྱང་ཐང་བྱེ་མ་སྤུངས་པའི་ཇག་ལམ་ན།།མི་བསད་རྟ་སྒྲིལ་བྱེད་པའི་ཇག་ཚོགས་ཚོ།།ནག་ཅན་མི་ཡི་གྲལ་མཐར་བརྩི་ན་ཡང༌།།གསལ་རིག་སེམས་ཀྱི་འོད་སྣང་མཉམ་པ་ཉིད།།
གཡོ་ཅན་ཁོང་འཛུམ་འཆོར་བའི་དགོད་སྒྲ་ཡིས།།ཅོལ་ཆུང་སྙིང་ལ་དགའ་བའི་མིག་འཕྲུལ་འདི།།སྲིད་མཚོར་དགའ་ཚལ་འཛིན་པའི་བྱིས་པ་ཚོའི།།སེམས་ཀྱི་ཚོར་རིས་མཚོན་པའི་སྣང་བསྙན་ཞིག།
2007/3/26/བྲིས།

གདུང་བའི་སྨྲེ་ངག


གཉིད་ནི་རྨོངས་དང་འཐོམ་པའི་ཆ་ལག་ཕྱིར།།སུ་དང་གང་གིས་བསྟོད་པ་མི་བྱེད་མོད།།རྨི་ལམ་གྲོང་ཁྱེར་འགྲིམས་པའི་ལྟད་མོ་ལ།།གཟིགས་ན་གཉིད་ལ་མི་བསྟེན་མཐུ་མེད་ཡིན།།ངོས་འཛིན་གཏོད་སོ་མེད་པའི་བར་སྣང་གི།།མཛེས་མཚོན་ཁ་དོག་བཀྲ་བའི་འཇའ་རིས་སྣེ།།འཁྲུལ་སྣང་ཨ་ཐས་ཟབ་པའི་བོད་རྒན་ཚོས།།རེ་བས་ཤི་འཐམ་བྱས་པའི་རྨི་ལམ་རིང༌།།གཞན་འཚང་སྔོག་པའི་ཕག་གི་མཆུ་ཏོ་ལ།།རང་འཚང་སྐྱག་པ་འགོས་པའི་དྲི་ངན་གྱིས།།དངོས་དོན་བདེན་པའི་དྲི་བསུང་འཐུལ་བ་ལ།།ཕན་པའི་རེ་བ་བཅོལ་པའི་འཁྲུལ་སྣང་ཟབ།།ཟླ་འོད་མུན་པས་ཟོས་པའི་མཚན་མོ་ན།།ནག་ཅན་རྐུན་མའི་གྲིབ་གཟུགས་མ་མཐོང་བར།།འབ་སྒྲས་གནམ་ས་དབྲལ་བའི་ཁྱི་རྒན་ལ།།རེ་བའི་བློ་གཏོད་བྱས་པའི་ལྷ་སྒྲུང་སྙན།།སྤང་རྒྱན་མེ་ཏོག་བཀྲ་བའི་གླིང་ཁ་ན།།ཕྱེ་མ་ལེབ་ཀྱིས་འཕུར་ལྡིང་རྩེན་པའི་རྗེས།།བསམ་མེད་བྱིས་པ་རྒྱུག་པའི་རྡོག་སྣེ་ནས།།གཡང་སའི་རྡོ་ལ་བརྡབས་པའི་ངུ་རྒྱངས་ཐོས།།ཁ་བ་ལྷབ་ལྷུབ་འབབ་པའི་དགུན་གཞུང་དུ།།འཁྱགས་པས་ས་གཞི་བསྡམས་པའི་སྲུབ་ཀ་ནས།།ལྗང་མདོག་མྱུ་གུ་འབུས་པའི་རེ་བ་འདིས།།མེས་པོའི་སྙིང་ལ་འཇའ་ཡི་ཁང་བཟང་བསྐྲུན།།བསམ་གཞིགས་འཁྱགས་ལ་འབྱར་བའི་གྲང་ལྷག་གསེབ།།རྣམ་རྟོག་བུ་ཡུག་འཚུབ་པའི་དུར་ཁྲོད་ན།།ཕ་མེས་སྟོང་གི་རྣམ་ཤེས་ཐིམ་པའི་ཤུལ།།རེ་བའི་ལྷག་མ་འཇགས་རྩྭ་སྐམ་པོ་ཙམ།། ༢༠༠༧.༣.༢༠ ལ་བྲིས།

ཕྱིར་དྲན།

རི་རྩེ་ཁ་བས་ཉིན་རེ་ཉིན་རེར་བསྟིམས།།ནགས་ཀྱི་ཤིང་ལོ་རིམ་གྱིས་རིམ་གྱིས་ལྷུང༌།།ད་ནི་ཁོར་ཡུག་མཛེས་པའི་རྣམ་ཤེས་འདིའང༌།།དགུན་འཁྱགས་ལྷགས་པའི་རུམ་དུ་འབྱར་བར་ངེས།།ད་ནངས་བྱེ་འུའི་གསུང་སྙན་མ་ཐོས་གོང༌།།ཞོགས་རླུང་བསིལ་མོས་ཕྲ་ཡོལ་ཁད་ཀྱིས་ཕྱེས།།མགོ་བོ་སྔས་ལ་འབྱར་བའི་རྨི་ལམ་ཡང༌།།གཟུགས་མེད་རླུང་བུ་ལྡང་བས་ཧད་ཀྱིས་དཀྲོགས།།དབྱར་དགུན་སྟོན་དཔྱིད་ཤོག་ལྷེ་བསྒྱུར་བ་བཞིན།།དུས་བཞི་ཤུགས་ཀྱིས་ལོ་ཡི་འཁོར་ལོ་བསྐོར།།མི་ལོ་བཅུ་བདུན་ས་མཐར་དལ་གྱིས་རྫོགས།།དྲན་ཤེས་བསྣོལ་མས་སེམས་ཀྱི་ཚོར་འདུ་བཀྲུགས།།ལྟེ་ཁྲག་གང་དུ་འཕོས་པའི་ཕ་ཡུལ་དང༌།།བྱམས་བརྩེ་དྲིན་གྱིས་བསྐྱངས་པའི་ཕ་མ་ཟུང༌།།ཤ་ཁྲག་གཅིག་པའི་སྤུན་ཉེ་གྲོགས་པོ་སོགས།།རི་ཁྲི་ཆུ་སྟོང་བརྒལ་བའི་ཕ་རོལ་ལུས།།མི་ཡུལ་འཁྱམས་པ་མི་ཡི་ལས་དབང་སྟེ།།ལྷ་ཡུལ་སླེབས་པའི་རེ་བ་བདག་ལ་མེད།།རང་ལུས་རང་ལ་དབང་བའི་ལས་དབང་ཞིག།མི་མངོན་གནམ་གྱི་དབྱིངས་ནས་གནང་རོགས་གྱིས།།
Powered by Blogger.

འཁྲུལ་སྣང༌།


ཡ་ཀི་རྩ་གསུམ་ལྷ་ཡུལ་མན་ཆད་ནས།།མ་ཀི་རྡོ་རྗེའི་དམྱལ་ཁམས་ཡན་ཆད་ན།།བྱ་བྱེད་བསྣོལ་མ་འཐབ་པའི་འཁྲུལ་སྣང་འདི།།སྒྱུ་རྩལ་སྙན་ངག་སྨྲ་བའི་ལྟད་མོ་ཞིག།
ཕ་རྒན་མུ་གེས་ཤི་བའི་དུར་ས་ན།།བུ་རྒྱུད་ཕྱུག་པོས་ཐུགས་སྤྲོ་བཏང་བྱས་ཏེ།།རྒྱ་ཟས་ལེའུ་བཅོ་བརྒྱད་བསྒྲིགས་པ་ཡིས།།རྣམ་ཤེས་འཁྱམས་པོ་འགུག་པའི་མགྲོན་བརྡར་སྨྲ།།
མ་རྒན་ཆང་སར་ཆས་པའི་རྟེན་འབྲེལ་ཐོག།བུ་མོས་བྲོ་གར་ཁྲབ་པའི་གླུ་གཞས་ཀྱིས།།ཆང་དང་སྦི་རག་མཆོད་པའི་སྐུ་མགྲོན་ཚོར།།སེམས་ཁམས་རླུང་གིས་བཀྱགས་པའི་འཁྲུལ་སྣང་སྟེར།།
ཡོད་ཚད་མཇེ་ཡིས་ཕུང་པའི་སྔགས་རྒན་དང༌།།དད་རྫས་སྟུ་རིན་སྤྲོད་པའི་གྲུབ་རྫུན་གཉིས།།རྨོངས་དད་བྲག་གི་བཙན་རྫོང་བརྩེགས་པའི་ནང༌།།བག་མེད་ཤ་ཆང་རོལ་བའི་འཁོར་ཚོགས་རྒྱས།།
སྔགས་ནག་གཅོད་པས་ལྷ་འདྲེ་གཡབ་མོ་བྱེད།།བསམ་མེད་བྱིས་པས་ཁྱི་སྨྱོན་རྡོ་ཡིས་རྡུང༌།།རྙོག་འཛིང་གཡབ་མོ་བྱེད་སའི་གྲུ་ག་འདིར།།ལྷིང་འཇགས་རེ་བ་མཚན་མོའི་རྨི་ལམ་ཙམ།།

སེམས་ཚོར་དམར་པོ།

རི་སུལ་ཁ་བས་བསྟིམས་པའི་ལྷག་རླུང་གསེབ།།རྣམ་ཤེས་རླུང་དང་འགྲོགས་པའི་བ་དོའི་ལུས།།གོས་མེད་གཅེར་བུར་འགྲིམས་པའི་སྐྱོ་གར་ལ།།བརྩེ་སེམས་གོས་བཟང་སྐོན་པའི་བྱམས་ལྡན་སུ།།མེ་མདའི་བུ་ཡུག་འཚུབ་པའི་གཡུལ་ས་ན།།ཚེ་སྲོག་རླུང་གིས་བདས་པའི་ཉམས་ཐག་འབུམ།།ཟུངས་ཁྲག་ཡུར་ཆུ་འཐེན་པའི་གཤིན་ཐང་ནས།།བདག་མེད་བམ་རོས་ཁེངས་པར་སུ་ཡིས་གཟིགས།།ལས་དབང་སྔས་སུ་བྱས་པའི་ལྷོ་མཐའ་ནས།། མིག་ཆུས་གདོང་རིས་བརླན་པའི་ངུ་རྒྱངས་ཀྱིས།།བྱང་བརྒྱུད་ཁ་བས་གཡོག་པའི་དུར་ས་ན།།རྒྱང་རིང་མིག་གིས་ཅེར་བ་སུ་ཡིས་གཟིགས།།གཞན་གནོད་བཞི་ལས་ལྡོག་པའི་སྲིད་དོན་གྱིས།།ཐར་པའི་ཁང་བཟང་མཛེགས་པའི་ལམ་ཟུར་ནས།།ཕ་ས་དོན་དུ་གཉེར་བའི་རྨི་ལམ་ལ།།རེ་བའི་རྨི་ཐག་འཕྱངས་པ་སུ་ཡིས་གཅོད།།ཡར་གི་གསེར་གྱི་ཉི་མའི་འོད་སྣང་འོག།མར་གི་འདུ་ལོང་འཚུབ་པའི་ལྷིང་འཇགས་སྣེ།།རྟག་བརྟན་ཐེར་ཟུག་འཛིན་པའི་འཁྲུལ་སྣང་ལ།།མི་རྟག་སྒྱུ་མའི་རང་ངོ་སུ་ཡིས་སྤྲོད།།མི་ཡུལ་སྔས་སུ་བྱས་པའི་གྲུ་ཁ་ན།།མི་ལོ་ལྔ་བཅུ་ཟིན་པའི་མཇུག་སྣེ་ནས།།མི་ནུས་གདམ་བྱ་མང་བའི་མིག་འཁྲུལ་གྱིས།།བྱིས་པའི་སེམས་ཁམས་བསླུས་པ་སུ་ཡིས་དཀྲོགས།།དགྲ་ལ་ཞི་མོལ་རེ་བའི་འཛུམ་མདངས་ཕག།གཉེན་ལ་རྒྱུག་རྡུང་ཕོག་པའི་ན་ཚ་ཡིས།།ཀི་ཅོས་གནམ་ས་དབྲལ་བའི་ཁོར་ཡུག་ན།།གཉིས་ཕན་འབྲས་བཟང་སྨིན་པ་སུ་ཡིས་རེ།།ནམ་མཁའི་འཇའ་རིས་མིག་གི་ལྟད་མོར་མཛེས།།སྤྲང་པོའི་གླིང་བུ་ཕྱུག་པོའི་རྣ་བར་སྙན།།ཞི་བའི་ལྟ་གྲུབ་བྱིས་པའི་བུ་རམ་གྱིས།།བཀྲེས་ལྟོགས་སེལ་བའི་ལོག་རྟོག་སུ་ཡིས་བཟློག།ཕ་རྒན་བསད་ནས་ཞགས་གསུམ་མ་ལོན་གོང༌།།ཕ་མེད་དྭ་ཕུག་འཁྱམ་པོས་ཁ་བཏགས་སྣེ།།ཕ་བསད་དགྲ་བོའི་མགུལ་ལ་འཐེན་པ་འདི།།ཕ་བཟང་བུ་ཡི་གྲལ་གསེབ་སུ་ཡིས་བཞག།ཁ་འདི་འཕྲེད་དུ་ཕྱེས་པའི་རྟེན་འབྲེལ་གྱིས།།འཕྲེད་འཕྲེད་གཏམ་ལ་རྫོགས་མཐའ་མི་འདུག་པས།།སེམས་ཀྱི་ཁྱེའུ་ཆུང་ངུས་པའི་མིག་ཆུ་རིས།།འཕྲེད་དུ་འབབ་པའི་སྙན་ཚིག་འདི་ཉིད་སྤེལ།།
སྤྱི་ལོ་༢༠༠༨ཟླ་བ་༣ཚེས་༧ཉིན་བྲིས།

དྲན་པའི་སྐྱོ་གདུང༌།


འདས་པའི་ལོ་ཟླ་སྐད་གཅིག་སྐད་ཅིག་གིས་བུད་ཐལ།།ད་ལྟའི་ཉིན་ཞག་ག་ལེ་ག་ལེ་ལ་འགྲོ་གིན།།མ་འོངས་ནམ་ཟླ་རིམ་གྱིས་རིམ་གྱིས་རང་འཛད་ནས།།མི་རྟག་སྒྱུ་མའི་རང་གཤིས་མི་ཚེ་འདི་རྫོགས་འགྲོ།།ཆུང་དུས་རྩེད་ར་འགྲིམས་པའི་སྤྲོ་སྣང་དེ་མ་ཐོབ།།གཞོན་དུས་ཆུང་མ་བསུས་ནས་ཁྱིམ་གཞིས་ཀྱང་མ་བཟུང༌།།རྒས་དུས་རེ་ལྟོས་བཅོལ་ས་བུ་ཚ་ཞིག་མེད་པར།།མི་རྟག་སྒྱུ་མའི་ལུས་འདི་རྨི་ལམ་བཞིན་རྫོགས་སོང༌།།ཆུང་དུས་ཐོས་པ་བསགས་པའི་སློབ་སྦྱོང་གི་འབྲས་བུ།།སྒོམ་ནས་རྒྱུད་ལ་སྦྱར་བའི་ཉམས་ལེན་ཙམ་མེད་པར།།ཁ་བཤད་ཆུ་ཡི་ལྦུ་བས་དུས་ཚོད་ཀུན་བསྐྱལ་ནས།།མི་རྟག་སྒྱུ་མའི་ལུས་འདི་སྟོང་པ་རང་ཆགས་སོང༌།།སྐྱིད་པའི་ཕ་ཡུལ་སླེབས་པའི་སྐལ་བ་དེ་མེད་འདྲ།།དྲིན་ཅན་ཕ་མ་མཇལ་བའི་ལས་འཕྲོ་དེ་མི་འདུག།དྲན་གདུང་སེམས་ཀྱི་མིག་ཆུ་ཁོག་པ་ལ་གཞུར་ནས།།མི་ཚེ་ས་མཐར་བསྐྱལ་བའི་ལས་དབང་འདི་སྐྱོ་བ།།སྤུན་མཆེད་གཉེན་ཚན་དུ་མའི་ཞལ་པར་ཙམ་ཐོས་བྱུང༌།།སྐབས་འགར་པར་དང་བརྙན་ཕབ་ལྟད་མོ་ཙམ་མཐོང་ཡང༌།།ཕན་ཚུན་ལྷན་དུ་འཛོམས་པའི་གོ་སྐབས་དེ་བརླགས་ནས།།མི་ཚེ་ཕལ་ཆེར་མི་ཡུལ་ལུང་པ་ལ་རྫོགས་སོང༌།།སྐྱེས་ས་འཚར་ས་བསིལ་ལྡན་བོད་ལྗོངས་ལ་ཡིན་ཡང༌།།རྒ་ས་ཤི་ས་ལྷོ་མཐའི་ཚ་བ་ནང་ངེས་པས།།རྒྱུས་མེད་མི་ཡུལ་འཁྱམས་པའི་ཉམ་ཆུང་གི་གྲྭ་རྐྱང༌།།བསམ་ཞིང་བསམ་ཞིང་སེམས་སྡུག་ན་བུར་བཞིན་འཐུལ་སོང༌།།མི་བཟད་སྐྱོ་བའི་ཚོར་རླབས་སེམས་ཁོང་ནས་འཕྱུར་ཡང༌།།གདོང་གི་བཤུ་སྐོག་མཉེད་པའི་འཛུམ་ཀོང་འདི་བསྟན་བཞིན།།མི་ཚོགས་འདྲ་མིན་གསེབ་ཏུ་འགྲོ་ཁུལ་རང་བྱེད་པ།།འཇིག་རྟེན་མི་ལུས་ལེན་པའི་ཡ་ཚུལ་ཙམ་ལོས་ཡིན།།
༢༠༠༨.༥.༡༧ཉིན་དགེ་འོས་B.edའཛིན་གྲྭའི་ནང་གནན་ཐབས་མེད་པའི་སྐྱོ་སྣང་ཞིག་གིས་རྐྱེན་བྱས་ཏེ་དཀར་པང་ཐོག་ཐོལ་བྱུང་དུ་བྲིས།

Followers


དྲྭ་ཚིགས་བཟོ་བཀོད་པ་བསོད་ནམས་འོད་ཟེར།
Tuesday, April 26, 2011
སྨྲ་སྒོ་མཚོན་ཆའི་འབྲུ་འགྲེལ་ཅུང་ཟད་གསལ་བ་བྱེད་པ།
སྨྲ་བ་ངག་གི་འཁོར་ལོས་ཤེས་བྱའི་ཁྱོན།།
དབང་བསྒྱུར་སྨྲ་བའི་རྒྱལ་པོའི་ཞབས་སེན་རྡུལ།།
དཔྲལ་བའི་ཐིག་ལེ་ཉིད་དུ་འཛིན་བྱེད་ན།།
སྨྲ་བྱེད་ངག་གི་རྩ་མདུད་གྲོལ་གྱུར་ཅིག།
ཤེས་བྱའི་གནས་ཀུན་གསལ་བར་གོ་འབྱེད་པའི།།
ཚོགས་གསུམ་རིག་པའི་དབྱངས་ཀྱི་ང་རོ་ཡིས།།
ཐུབ་བསྟན་གངས་རི་སྐྱོང་བའི་ལོ་པཎ་ཚོར།།
མི་ཕྱེད་དད་པས་སྙིམ་པ་གཙུག་ན་ཟུམ།།
སྔོན་མེད་སྒྲོ་གདུག་རྩེན་པའི་གཙུག་ལག་ནགས།།
མཛེས་པ་བསྐྲུན་པའི་ལང་ཚོ་མི་ལྡནཡང་།།
སྐྱེས་སྦྱངས་གོམས་པའི་ཐིག་ལེ་སྣུམ་པོ་འདིས།།
གཉིས་སྐྱེས་ཕལ་བའི་གྲལ་དང་མཚུངས་མིན་སྙམ།།
དེ་སླད་རང་གི་ཡིད་ལ་གོམས་ཕྱིར་དང་།།
སྐལ་སྙམ་གཞན་ལའང་ཅུང་ཟད་ཕན་སྙམ་ནས།།
སྔོན་བྱོན་མཁས་པས་བཅས་པའི་གཙུག་ལག་མཛོད།།
རྣམ་འབྱེད་གསར་པའི་ལྡེ་མིག་འདི་ཉིད་བསྐྲུན།།
ཞེས་ཤིས་པ་བརྗོད་པ་དང་། ཕྱག་བྱེད་པ་དང་། དངོས་པོ་ངེས་པར་བསྟན་པའི་ཚིག་དག་གི་བརྗོད་པའི་མེ་ཏོག་གི་ཕྲེང་བས་སྔུན་དུ་བསུས་ཏེ། འདིར་གང་ཞིག་བརྗོད་པར་བྱ་བ་ནི། སྨྲ་བའི་སྒོ་མཚོན་ཆ་ལྟ་བུ་ཞེས་གྲགས་པ་དེའི་ཚིག་དོན་གྱི་ཆ་ཅུང་ཟད་འགྲེལ་བ་ཡིན་ལ། དེ་ཉིད་ཇི་ལྟར་བཤད་པའི་ཚུལ་ནི། རྩ་བ་དང་ཡན་ལག་གི་ས་བཅད་ནང་གསེས་ཀྱི་རྣམ་གྲངས་དབྱེ་བའི་ལུགས་སུ་མ་བྱས་པར། ས་བཅད་ཆེ་ཆུང་ཀུན་དོན་ཚན་ལུ་གུ་བརྒྱུད་དེ། རྩ་བའི་བཤད་པ་བསྡུས་པ་རྣམས་རྒྱས་སུ་གཏོང་། རྒྱས་པ་རྣམས་རང་མལ་བཞག། མ་བཤད་པ་དང་མི་གསལ་བ་རྣམས་བཤད་ཅིང་གསལ་བར་བྱ། མཁས་པའི་བཞེད་སྲོལ་མི་འདྲ་བ་རྣམས་ལོགས་སུ་བཀོད། ཉེ་བར་མཁོ་བའི་དོན་གནད་ཁ་ཤས་ཀྱིས་ཟུར་རྒྱན་ཏེ་བཤད་པའོ།། གང་ལ་བརྟེན་ནས་འཆད་པ་ནི། སྨྲ་སྒོ་རང་འགྲེལ་དུ་གྲགས་པ་དང་གཞན་དུ་དཔལ་རོང་ཟོམ་མ་ཧཱ་པཎྜི་ཏས་མཛད་པར་གྲགས་པ་དེ་ཉིད་བསྟན་བཅོས་འཛིན་གྲྭའི་སློབ་ཚན་ཡིན་པས་འབྲུ་སྣོན་པའི་གཞིར་བྱས། དེའི་ཐོག་ཏུ། འཇམ་མགོན་ས་པཎ་གྱི་སྨྲ་སྒོའི་ས་བཅད་དང་། སྨྲ་སྒོའི་འགྲེལ་བ་སྒྲ་ལ་འཇུག་པ། ལོ་ཙཱ་བ་ལྕེ་ཁྱི་འབྲུག་གིས་མཛད་པར་གྲགས་པའི་གནས་བརྒྱད་རྩ་འགྲེལ། དཔང་ལོ་ཆེན་པོའི་ཚོགས་གསུམ་གསལ་བ། སྐྱོགས་སྟོན་ལོ་ཙཱ་བའི་བརྡ་གསར་རྙིང་ལི་ཤིའི་གུར་ཁང་། སྣར་ཐང་ལོ་ཙཱ་བ་སངྒཱ་ཤྲཱིའི་སྔགས་ཀློག་ཐབས། པཎ་ཆེན་ཤཱཀྱ་མཆོག་ལྡན་གྱི་སྨྲ་སྒོའི་འགྲེལ་བ་སྨྲ་བའི་རྒྱན། བསྟན་དར་ལྷ་རམས་པའི་ཡིག་བཤད་མཁས་པའི་ཁ་རྒྱན། དམུ་དགེ་བསམ་གཏན་གྱི་དབྱངས་ཅན་སྒྲ་མདོའི་འབྲི་འགྲེལ་དང་བློ་གསར་དགའ་སྟོན་བཅས་ལ་བརྟེན་ནས་སོ།།
བསྟན་བཅོས་ཀྱི་མཚན་བཤད་པ།
རྒྱ་སྐད་ཀྱི་མཚན་ནི།
རྒྱ་གར་སྐད་དུ། ཝ་ཙ་ན་མམུ་ཁཱ་ཡུདྷོ་པ་མ་ནཱ་མ།
དེ་ལ་རྒྱ་གར་ནི། དུས་འཁོར་ལས། འཕགས་ཡུལ་བོད་ལི་རྒྱ་ནག་དང༌། །ཀཻ་ལ་ཤ་དང་གངས་ཅན་མཚོ། ། ཞེས་འབྱུང་བ་ལྟར་འཛམ་གླིང་དུམ་དྲུག་བགོས་པའི་དབུས་ན་གནས་པ་ཏེ། མིང་གི་སྒྲ་དོན་ནི། བུ་སྟོན་དང་། རྗེ་བཙོང་ཁ་པ་ཆེན་པོ་སོགས་ཚད་མའི་སྐྱེས་བུ་རྩོད་མེད་ཚོས། རྒྱུ་མཚན་ལ་མ་ལྟོས་པར་འདོད་རྒྱལ་དུ་བཏགས་པར་འདོད་དེ། འདོགས་ལུགས་ནི། མཉན་ཡོད་གནས་བཅས་ཙམ་པ་ཀ།། ཝཱ་ར་ཎཱ་སི་ཡངས་པ་ཅན།། རྒྱལ་པོའི་ཁབ་དང་དྲུག་པོ་སྟེ།། འདི་དག་གྲོང་ཁྱེར་ཆེན་པོ་ཞེས།། ཞེས་པ་ལྟར་གྲོང་ཁྱེར་དྲུག་གི་བདག་ཉིད་ལ་རྒྱ་གར་ཞེས་འདོད་རྒྱལ་དུ་བཏགས་པ་གསུངས། རྗེས་སུ་གྲུབ་པའི་མིང་དུ་འདོད་པ་དག་གི་ནང་ནས། ཁ་ཅིག རྒྱ་ནི་སྣོད་ཀྱི་ས་ཁྱོན་རྒྱ་ཆེ་བ་དང་གར་ནི་གཅུད་ཀྱི་སེམས་ཅན་གླུ་གར་རོལ་མོ་ལ་དགའ་བའི་རིགས་ཡིན་པས་སོ་ཟེར་ཏེ། ཤིན་ཏུའང་མོད་དོ་སྙམ་མོ།། གཞན་དག རྒྱ་ནི་ས་ཁྱོན་དང་གར་གི་གོས་ཀྱི་ཁ་ཁོག་སྟེ། རྒྱུན་ལྡན་གྱོན་གོས་དཀར་པོ་ཤས་ཆེར་གོན་པའི་རིགས་ཡིནཔས་སོ་ཟེར་ཏེ་དེ་ཡང་ཤིན་ཏུ་འདྲ་བར་སྣང་ལ།[1] དེས་ཚིག་ཟླ་དྲངས་པས་རྒྱ་ནག་ཀྱང་ས་ཁྱོན་རྒྱ་ཆེ་བ་དང་གོན་གོས་ནག་པོ་གོན་པས་འཇོག་པར་བཤད་པའང་འདྲ་བ་སྣང་ངོ་།། ལ་ལ། རྒྱ་ནི་མི་རིགས་དང་གར་ནི་མཆོག་གམ་རབ་གྱི་དོན་ཏེ། རྒྱའི་རིགས་ཀྱི་ནང་ནས་རབ་གམ་མཆོག་ཏུ་འདོད། འགའ་ཞིག མཐའ་ཡས་རྒྱ་མཚོ་དང་ལོགས་སུ་གར་བས་དེ་ལྟར་འདོགས་པར་བཤད། སུམ་པའི་འཛམ་གླིང་སྤྱི་བཤད་ལས། རྒྱ་གར་ཞེས་པ་ཁ་ཆེ་བལ་བོ་བོད་སོག་ཞེས་པ་ལྟ་བུ་འདོད་རྒྱལ་དུ་བཏགས་པའི་མིང་ཞེས་ཀྱང་རུང་ལ། གལ་ཏེ་སྒྲ་བཤད་བྱེད་ན་རྒྱ་གར་གྱི་ཡུལ་ན་སྣོད་བཅུད་ཀྱི་ཁྱད་ཆོས་ཕུལ་དུ་བྱུང་བ་མང་བའི་སྒོ་ནས་ཡུལ་གཞན་ལས་ལྷག་སྟེ་གར་བ་ལྟ་བུར་སྣང་བ་དང་། ཡང་གངས་ཅན་གྱི་ཡུལ་ལས་ལྷོ་ངོས་སུ་གར་ནས་ཡོད་པ་དང་། ཡུལ་དེ་ན་རི་ཉུང་བས་རི་སོ་སོར་ཚོམ་བུ་ལྟར་གར་ནས་ཡོད་པའི་སྒོ་ནས་ཀྱང་དེ་སྐད་བརྗོད་འོས་སོ།།ཞེས་གསུངས་ལ། སྔོན་གྱི་ཡིག་རྙིང་རྣམས་སུ་རྒྱ་ནག་གི་རྒྱ་ལ་དགྱ་ཞེས་བྲིས་པའང་ཡོད་དེ། དེ་ནི་དགྲ་དང་གོ་དོན་གཅིག་པས། དགྱ་ནག་པོ་ཞེས་པའང་དགྲ་ནག་པོ་དོན་ཡིན་ཞིང་། དེའི་ཚིག་ཟླས་དྲངས་པའི་རྒྱ་དཀར་པོར་ཡང་སྲིད་ཀྱི་ཐད་ནས་རྒྱ་དང་ཆོས་དང་རིག་གཞུང་གི་ཐད་ནས་དཀར་པོ་ཡིན་པས་འགྲེལ་བརྗོད་ཀྱང་མཐོང་མོད་བརྟག་པར་བྱ་བའི་གནས་སོ།། མཁས་པ་ལ་ལས། རྒྱ་དཀར་ནག་སེར་གསུམ་གདོང་གི་རྒྱ་སྤུའི་ཁ་དོག་གི་སྒོ་ནས་འདོགས་པ་སྟེ། རྒྱ་གར་གྱི་མི་རྣམས་རྒས་པའི་སྐབས་གདོང་གི་རྒྱ་དང་ཁ་སྤུ་དཀར་པོ་འགྱུར་འགྲོ་བས་སོ། རྒྱ་ནག་པོ་དང་སེར་པོ་དག་ཀྱང་རྒས་དུས་རྒྱ་དང་ཁ་སྤུ་སེར་པོ་འགྱུར་འགྲོ་བས་དེ་ལྟར་འདོགས་པར་བཤད་ན་ཤེས་ཉམས་མཚར་བའི་བཤད་པ་མཛད་དོ། །དེ་ལྟ་ན་ངས་ཀྱང་གཅིག་བཤད་པར་འདོད་དེ། རྒྱ་ནི་སྣོད་ཀྱི་འཇིག་རྟེན་ཏེ་ཡངས་ཤིང་རྒྱ་ཆེ་བ་དང་། གར་ནི་བཅུད་ཀྱི་སེམས་ཅན་ཚོའི་བསམ་པའི་རང་བཞིན་ཏེ་རྣམ་དཀར་དགེ་སྒྲུབ་ལ་དགའ་བས་རྒྱ་གར་ཞེས་བཏགས་པ་ཡིན་ཟེར་ན་མི་ཆོག་ཅི་ཞིག་འཆིས། ཡང་ན། རྒྱ་ནི་རིགས་དང་གར་ནི་སེམས་པ་ལ་འགྲེལ་ཏེ། རྒྱ་གར་བ་རྣམས་སྐྱེས་ཆེན་དུ་མ་བྱོན་པའི་སྐུའི་བྱིན་རླབས་དང་གསུང་གི་ལེགས་བཤད་ལ་བརྟེན་ནས་སེམས་པ་དཀར་པོ་ཡིན་པས་སོ།། དེའི་ཚིག་ཟླས་དྲངས་པའི་རྒྱ་ནག་ཀྱང་ཟློག་ཕྱོགས་ཀྱིས་འགྲེལ་ན་འཐད་མིན་བརྟག་པར་མཛོད། སྐད་ནི། སྔོན་གྱི་འཕགས་ཡུལ་མཁས་པ་ཚོས་འཛམ་བུ་གླིང་ལ་སྐད་རིགས་བདུན་བརྒྱ་ཉི་ཤུ་ཡོད་པ་བཤད་དེ། སྐབས་དེའི་འཛམ་གླིང་ནི་ད་ལྟའི་རྒྱ་གར་འདི་རང་ལ་ངོས་འཛིན་བྱེད་པ་འདྲ་སྟེ། ཇོ་བོ་རྗེ་གསེར་གླིང་ལ་ཕེབས་སྐབས་འཛམ་གླིང་བརྒལ་ནས་ཕེབས་ཚུལ་དང་། བོད་དུ་ཕེབས་དུས་ཀྱང་འཛམ་གླིང་བརྒལ་ནས་བོད་དུ་སོང་ཚུལ་བཀའ་གདམས་ཕ་ཆོས་སུ་འཁོད་པ་ལས་ཤེས་ནུས་སོ།།་དེ་ལྟར་ན་སྐད་རིགས་བདུན་བརྒྱ་ཉི་ཤུ་ཞེས་པའང་རྒྱ་གར་གྱི་ནང་ཁུལ་ཁོ་ནར་སེམས་ཏེ། དེ་ཡང་གྲོང་ཁྱེར་དང་གྲོང་བརྡལ། གྲོང་གསེབ་དང་རོང་འབྲོག་གི་ཁྱད་པས་དབྱེ་བ་ལས་གནམ་དང་སའི་ཁྱད་པ་ཤོར་བའི་སྐད་རིགས་མང་པོ་དེ་འདྲ་རང་ལ་གོ་རྒྱུ་མིན་པ་འདྲ། དེ་དག་ཡི་གེའི་ཁོངས་སུ་བསྡུ་བའི་ཚེ། འགའ་ཞིག་ཏུ་ཡིག་རིགས་སུམ་བརྒྱ་དྲུག་ཅུར་བཤད་པ་ཡོད་ཀྱང་། རྒྱ་ཆེར་རོལ་པའི་མདོ་ལས་དངོས་སུ་བགྲང་པ་ནི་དྲུག་ཅུ་རྩ་བཞི་སྟེ། དེ་དག་ཀྱང་སྐད་རིགས་ཆེན་པོ་བཞིར་འདུས་ཤིང་། བཞི་པོ་དེ་དག་གི་ཁུངས་དང་རྩ་ལྟ་བུ་ཡང་ལེགས་སྦྱར་ལྷ་ཡི་སྐད་ལ་ཐུག་སྟེ། འདི་ལ་ལྷ་ཡི་སྐད་ཅེས་པའི་རྒྱུ་མཚན་ནི། ཐོག་མར་གསུང་པ་པོ་ལྷ་ཚངས་པ་ཡིན་པས་དེས་ན་ལྷ་ཡི་སྐད་ཅེས་བརྗོད་པའོ། །གཞན་དུ། ཡུལ་དེར་སྐད་རིགས་ཆེན་པོ་བཞི་ཡོད་པ་ལས། ལེགས་སྦྱར་ནི་ལྷའི་སྐད་དུ་གྲགས་ཀྱང༌། མི་ཡུལ་དུ་གཙོ་བོར་རྒྱ་གར་འཕགས་ཡུལ་གྱི་མཁས་པ་རྣམ་ལ་གྲགས་པས། རྒྱ་གར་སྐད་ཅེས་བྱ་བ་གསུངས་ཏེ་རྒྱུ་མཚན་འབྲེལ་ཆགས་པ་སྣང་།[2] དུ་ནི་ངོས་བཟུང་བའོ།། ཁམས་འགྲེལ་ལས་ནི། དུ་ཞེས་པ་གནས་གཞི་ལ་འཇུག་པའི་རྣམ་དབྱེ་བདུན་པ་སྟེ། ཞེས་ཀྱང་གསུངས་སྣང་། དེས་ན་རྒྱ་གར་སྐད་དུ་ཞེས་གཞུང་འདི་གང་ལས་བསྒྱུར་བའི་ཁུངས་སྟོན་པའོ། སྐད་དེ་ཉིད་ཀྱི་ཐོག་ཏུ་བསྟན་བཅོས་འདིའི་མཚན་ལ། ཝ་ཙ་ན་མམུ་ཁཱ་ཡུདྷོ་པ་མ་ནཱ་མ། ཞེས་བྱའོ། །
བོད་སྐད་ཀྱི་མཚན་ནི།
བོད་སྐད་དུ། སྨྲ་བའི་སྒོ་མཚོན་ཆ་ལྟ་བུ་ཞེས་བྱ་བ།
བོད་ནི། གོང་དུ་བགྲངས་པ་ལྟར་འཛམ་གླིང་དུམ་དྲུག་བགོས་པའི་ནང་ཚན་བོད་ཅེས་པ་སྟེ། མིང་འདི་ལྟར་གྲགས་པ་ཡང་མཁས་པ་ཁ་ཅིག་ནི། འདོད་རྒྱལ་དུ་བཏགས་པ་འདོད་དོ། །ལ་ལ་ནི་ཆོས་ལུགས་ཀྱི་མིང་ཡུལ་ལ་ཐོགས་པ་འདོད་པ་དང་། གཞན་དག་སྟོད་ནས་བྲོས་པའི་མིང་ལས་སྟོད་བོད་བྱུང་བ་གླེང་། རྒྱ་ནག་ཐང་གི་ཡིག་ཚང་ལས་ཀྱང་ཐུའུ་བྷོད་()ཞེས་འབྱུང་ཞིང་། རྒྱ་གར་བས་ཊིབྷོཊ་ཟེར་ལ། དེང་སང་གི་བར་ཕྱི་གླིང་སྐད་ཡིག་ཏུའང་ཊི་བྷོཊ་(Tibet)ཞེས་བྱ་བ་དག་ལའང་དཔྱད་ན་ལོ་རྒྱུས་ཀྱི་རྒྱབ་ལྗོངས་མང་། འགའ་ཞིག་ལེགས་སྦྱར་གྱི་བྷོཊ་ཅེས་ཟུར་ཆགས་པར་འདོད། ཁ་ཅིག་རྣམ་དབྱེ་བརྒྱད་པ་བོད་པའི་སྒྲས་བཏགས་པར་བཤད། གང་ལྟར་ཡང་བོད་མངའ་མཛོད་ཀྱི་སྐབས་ནས་བོད་ཅེས་པའི་མིང་འདི་བྱུང་སྣང་སྟེ། ལྡེའུའི་ཆོས་འབྱུང་དང་། ཁུ་སྟོན་གྱི་ལོ་རྒྱུས་ཆེན་མོ་སོགས་ལས། ཡུལ་གྱི་མིང་ལ་བོད་ཁ་གཡའ་དྲུག་ཟེར། ཞེས་སོགས་འབྱུུང་བས་སོ།། མིང་འདི་གང་ལ་འདོགས་པའི་གཞི་ནི་ཡུལ་དུས་གནས་སྐབས་ཀྱི་འཕོ་འགྱུར་ལ་ལྟོས་པ་སྟེ། ཁྲི་སྲོང་བཙན་གྱི་སྐབས་སུ་སྟོད་མངའ་རིས་ནས་སྨད་མདོ་ཁམས་སྒང་དྲུག་ལ་ཁྱབ་པའི་ཡུལ་སྤྱིའི་མིང་ཡིན་ནོ།། སྐད་ནི་དེར་གནས་པའི་ཡུལ་མིའི་རང་བཞིན་གྱི་སྐད་དོ།། དུ་ནི་ངོས་བཟུང་བའི་དོན་ཏེ། སྐད་དེར་བསྒྱུར་ན། སྨྲ་བའི་སྒོ་མཚོན་ཆ་ལྟ་བུ་ཞེས་བྱ་བའོ། །དེ་ཡང་བསྟན་བཅོས་ཀྱི་མིང་ལ། རྗོད་བྱེད་ཚིགས་བཅད་ཀྱི་གྲངས་ཀའི་སྒོ་ནས་བཏགས་པ་དང་། བརྗོད་བྱ་བསྟན་དོན་སྒོ་ནས་བཏགས་པ། དེ་བཞིན་དུ་ཞུ་བ་པོ་དང་། རྩོམ་པའི་ས་གནས། རྩོམ་པ་པོ། བཅས་ཀྱི་སྒོ་ནས་བཏགས་པ་དང་། དཔེ་དང་བྱེད་ལས་གཟུགས་སོགས་ཅི་རིགས་ཀྱི་སྒོ་ནས་འདོགས་པ་ཡོད་དེ། དེ་དག་ངག་ཐོག་ནས་ཤེས་པར་བྱ་ལ། སྐབས་འདི་ནི་དཔེ་དང་བྱེད་ལས་ཀྱི་སྒོ་ནས་བཏགས་པ་ཡིན་ནོ།། བསྟན་བཅོས་ཀྱི་དབུར་རྒྱ་སྐད་སྨོས་པའི་དགོས་པ་ནི་སྐད་ལ་བག་ཆགས་འཇོག་བ་དང་། རྒྱུད་ལ་བྱིན་རླབས་འབྱུང་། བསྟན་བཅོས་ཁུངས་པ་བཙུན་པ་བསྟན་པའི་ཆེད་དུ་ཡིན་པའི་འགྲེལ་བརྗོད་དག་ཀྱང་གཞན་ལས་ཤེས་པར་བྱའོ།།
བསྟན་བཅོས་ཀྱི་འགྱུར་ཕྱག་གི་ཚུལ་ནི།
སྨྲ་བའི་མཆོག་ཐམས་ཅད་མཁྱེན་པ་ལ་ཕྱག་འཚལ་ལོ། །
སྨྲ་བའི་སྐྱེས་མཆོག་ཤེས་བྱ་ཐམས་ཅད་ལག་འཐིལ་དུ་སྐྱུ་རུ་ར་བཞག་པ་ལྟར་མངོན་དུ་མཁྱེན་པ་ལྷག་པའི་ལྷ་མཆོག་འཇམ་པའི་དབྱངས་ལ་ཕྱག་འཚལ་ལོ།། ཞེས་པའོ། །དེ་ལ་སྤྱིར་འགྱུར་ཕྱག་གི་དོན་ནི། རྒྱ་གར་མཁས་པས་བརྩམས་པའི་གཞུང་བོད་སྐད་དུ་བསྒྱུར་བ་དེ་ཉིད་འགྱུར་བ་མཐའ་ཕྱིན་པའི་ཆེད་རང་གི་ལྷག་པའི་ལྷ་ལ་ཕྱལ་འཚལ་བ་ལ། འགྱུར་ཕྱག་ཅེས་བྱ་སྟེ། ཁྲི་སྲོང་གི་སྐབས་བཀས་བཅད་ཀྱིས་གཏན་ལ་ཕབ་རྗེས་རྒྱལ་ཁྲིམས་གསེར་གྱི་གཉའ་ཤིག་མ་འཆག་གི་བར། སྡེ་སྣོད་གསུམ་གྱི་ཁྱད་པས་འགྱུར་ཕྱག་ལའང་ཁྱད་པར་ཡོད་པ་ལྟར། ཕྱིས་ཀྱི་ལོ་པཎ་ཕལ་ཆེ་བས་ཀྱང་བཀས་བཅད་དེ་དག་གཞིར་མཛད་པ་ལྟར་ན། འདིར་མངོན་པའི་སྡེ་སྣོད་ཀྱི་ཁོངས་སུ་གཏོགས་པས་འཇམ་པའི་དབྱངས་ལ་ཕྱག་འཚལ་བ་ཡིན་ནོ།། ཞེས་བརྗོད་པ་རིགས་སོ།།
བསྟན་བཅོས་ཀྱི་མཆོད་བརྗོད་དང་རྩོམ་པ་དམ་བཅའ་བ།
སྨྲ་མཆོག་གཙོ་ལ་ཕྱག་འཚལ་ནས།།
སྨྲ་བའི་ཡན་ལག་རྫོགས་དོན་དུ།།
ངག་གི་འདུ་བྱེད་གང་དེ་ཡི།།
ཚོགས་པ་བདག་གིས་བཤད་པར་བྱ།།
ཡི་གེ་བརྡ་སྤྲོད་པ་པོ་ཚངས་པ་དང་། དབང་ཕྱག ཁྱབ་འཇུག བརྒྱ་སྦྱིན་སོགས་ལྷ་དང་། གཞུང་དང་སྙན་ཚིག་གི་བྱེད་པོ་གྲོག་མཁར་བ་དང་། རྒྱས་པ་དང་། སེར་སྐྱ་རྐང་མིག་གཟེགས་ཟན་སོགས་སྔོན་གྱི་ཐར་པ་འཚོལ་བའི་བྲམ་ཟེ་དང་། གཅེར་བུ་བ་དང་། མགོ་བྲེགས་སོགས་དགེ་སྦྱངས་ཏེ། བརྡ་དང་ཐ་སྙད་ལྟ་བ་དང་གྲུབ་མཐའ་ཅི་རིགས་པ་སྨྲ་བའི་སྐྱེས་བུ་ཀུན་གྱི་མཆོག་དང་རབ་དང་གཙོ་བོར་གྱུར་པ་སྟོན་པ་ཡང་དག་པར་རྫོགསཔའི་སངས་རྒྱས་བཅོམ་ལྡན་འདས་ལ་ཕྱག་འཚལ་ལོ། ཞེས་མཆོད་པར་བརྗོད་ནས། གསུང་རབ་དགོངས་འགྲེལ་དང་བཅས་པའི་གཞུང་ཆེན་པོ་དང་དེའི་ཡན་ལག་ཐ་སྙད་རིག་པའི་གནས་ཀུན་ཕྱིན་ཅི་མ་ལོག་པར་བརྡ་སྤྲོད་པའི་སྨྲ་བའི་ཡན་ལག་ཡོངས་སུ་རྫོགས་པའི་དོན་དུ། སྨྲ་བ་ངག་གི་འདུ་བྱེད་གྱུར་པའི་མིང་ཚིག་ཡི་གེའི་ཚོགས་པ་གང་ཡིན་པ་དེ་ནི། བདག་གིས་འདིར་བཤད་པར་བྱའོ། ཞེས་བརྩམ་པ་དམ་བཅའ་བ་སྟེ། མཆོད་བརྗོད་མཛད་པའི་དགོས་པ་དང་། རྩོམ་པ་དམ་བཅའ་བའི་སྐབས་ཀྱི་དགོས་སོགས་ཆོས་བཞི་སོགས་ནི་གཞུང་གཞན་དང་ཁོག་འདྲ་བས་གཞན་དུ་གཟིགས་པར་བྱའོ།།
ད་ནི་སྒོ་དེ་དང་ལྡན་པའི་པའི་བསྟན་བཅོས་དངོས་བཤད་པར་བྱ་སྟེ། དེ་ལ་གསུམ། མིང་ཚིག་གཉིས་ཀྱི་རྩོམ་གཞི་ཡི་གེ་བཤད་པ་དང་། ཡི་གེ་ལས་བྱུང་བའི་མིང་བཤད་པ། མིང་ལས་བྱུང་བའི་ཚིག་བཤད་པའོ། །

དང་པོ་ཡི་གེའི་ཚོགས།
  
༡ ཡི་གེ་འབྱུང་བའི་རྒྱུ་དང་རྐྱེན་སོགས་ལས་དབྱངས་ཀྱི་རྩ་བ་བདུན་འབྱུང་ཚུལ་སོགས་སྤྱིར་བསྟན་པ།
1. ཡི་གེ་སྐྱེ་བའི་གནས་བརྒྱད་བསྟན་པ།
ཁོག་པ་མགྲིན་པ་རྐན་དང་ལྕེ།།
སྣ་དང་སྤྱི་བོ་སོ་དང་མཆུ།།
དབྱངས་གསལ་གྱི་ཡི་གེ་རྣམས་གང་ལས་སྐྱེ་བའི་གནས་ནི་བརྒྱད་དེ། ཁོག་པ་དང་། མགྲིན་པ་དང་། རྐན་དང་། ལྕེ་དང་། སྣ་དང་། སྤྱི་བོ་དང་། སོ་དང་། མཆུ་རྣམས་སོ། །དབྱངས་གསལ་གྱི་ཡི་གེ་གང་ཞིག་ཡིན་ཡང་སྐྱེ་བའི་གནས་ཀྱི་རྒྱུ་བརྒྱད་པོ་དེ་དག་གང་རུང་ལ་མ་བརྟེན་པར་འབྲས་བུ་ཡི་གེ་སྐྱེ་བའི་གནས་མེད་དོ། །དཔེར་ན། པི་ཝང་གི་སྒྲ་འབྱུང་བ་ལ། སྒྲ་དེ་སྐྱེ་བའི་གནས་པི་ཝང་གི་ཁོག་པ་དང་། རྒྱུད་ཐག པགས་པ། ལག་པ་བཅས་པ་མ་བརྟེན་པར་འབྱུང་བ་མེད་པ་བཞིན་ནོ། །དེས་ན་གནས་བརྒྱད་པོ་དེ་དག་གི་སྤྱིའི་ཚོགས་པ་ནས་དབྱངས་གསལ་ཡི་གེའི་སྒྲ་འབྱུང་བ་ཡིན་ནོ། །
2.  བྱེད་པའི་རྐྱེན་བཞི་བསྟན་པ།
སྤྱི་དང་རེ་རེའི་ཆ་དག་ལས།།
ཕྲད་དང་ཅུང་ཟད་ཕྲད་པ་དང་།།
དོག་པ་དང་ནི་ཡངས་པ་ནས།།
ཡི་གེ་སྐྱེ་བའི་གནས་དེ་དག་ཕན་ཚུན་ཕྲད་པའི་རྐྱེན་ནི་བཞི་སྟེ། ཕྲད་པ་དང་། ཅུང་ཟད་ཕྲད་པ་དང་། དོག་པ་དང་། ཡངས་པ་སྟེ་བྱེད་པ་བཞི་པོ་ཅི་རིགས་པ་ལ་བརྟེན་ནས་དབྱངས་གསལ་ཀྱི་ཡི་གེ་དག་གི་སྒྲ་གདངས་འབྱུང་བ་ཡིན་ནོ། །རྐྱེན་བཞི་བོ་དེ་དག་ཕན་ཚུན་མ་ཕྲད་པར་སྒྲའི་ང་རོ་འབྱིན་པ་མི་ནུས་སོ།། དེ་ལ། ཕྲད་པ་ནི། ལྕེ་དང་། རྐན་དང་། སོ་དང་། མཆུ་རྣམས་སོ།། ཅུང་ཟད་ཕྲད་པ་ནི། མགྲིན་པ་དང་། སྣ་དང་། སྤྱི་བོ་དང་། ཁོག་པ་རྣམས་སོ།། དོག་པ་ནི།་མགུལ་བ་དང་། སྣ་དང་། སྤྱི་བོ་རྣམས་སོ། ། དཔེར་ན། པི་ཝང་གི་རྒྱུ་སྐུད་སྦམ་ཕྲ་དུ་མ་བརྒྱུས་པ་དག་མཛུབ་མོ་དང་ཕྲད་པ་ལ་བརྟེན་ནས་པི་ཝང་གི་སྒྲ་འབྱུང་གི། མ་ཕྲད་ན་མི་འབྱུང་བ་བཞིན་ནོ། །དེས་ན་བྱེད་པ་བཞི་པོ་དེ་དག་ལ་བརྟེན་ནས་དབྱངས་གསལ་གྱི་སྒྲ་འབྱུང་བ་ཡིན་ནོ།། ནས་ནི་གང་ལས་འབྱུང་བའི་ཁུངས་བསྟན་པའི་བདུན་པའོ།།
3.  འབྱིན་པའི་ང་རོ་བདུན་བཤད་པ་ལ།
དྲང་དང་བསྒྲེང་དང་བཀུག་པ་དང་།།
བསྟོད་པ་དང་ནི་སྨད་པ་དང་།།
བསྒྲིམས་དང་ཀློད་པའི་ང་རོ་འབྱུང་།།
གནས་དང་བྱེད་པའི་རྒྱུ་དེ་དག་ལས་འབྲས་བུ་ཡི་གེ་རང་གི་ངོ་བོའི་ང་རོ་ནི་བདུན་ཏེ། དྲང་པ་དང་། བསྒྲེང་པ་དང་། བཀུག་པ་དང་། བསྟོད་པ་དང་། སྨད་པ་དང་། བསྒྲིམ་པ་དང་། ཀློད་པའི་ང་རོ་བདུན་པོ་དག་འབྱིན་པ་ཡིན་ནོ། ། དེ་ལ་དྲང་པ་ནི་ཨ་དང་། བསྒྲེང་བ་ནི་ཨེ། བཀུག་པ་ནི་ཨི། བསྟོད་པ་ནི་ཨོ། སྨད་པ་ནི་ཨུ། བསྒྲིམས་པ་ནི་རྀ། ཀློད་པ་ནི་ལྀ་སྟེ། བདུན་པོ་དེ་དག་ནི་རང་བཞིན་གྱི་ཡི་གེ་ཞེས་སུ་འཆད་དོ། །དེ་དག་ལ་ནང་གསེས་ཀྱི་རིགདས་གཉིས་སུ་ཕྱེ་སྟེ། ཨ་ཨི་ཨུ་གསུམ་ནི་ལྷན་སྐྱེས་ཀྱི་ཡི་གེ་དང་།་ལྷག་མ་རྀ་ལྀ་ཨེ་ཨོ་བཞི་ནི་ཕན་ཚུན་སྦྱར་བའི་ཡི་གེ་ཡིན་ནོ།། ཇི་ལྟར་སྦྱར་བ་ཡིན་ཞེ་ན། ཨ་དང་ཨི་སྦྱར་བ་ལས་ཨེ་འབྱུང་དང་། ཨ་དང་ཨུ་སྦྱར་བ་ལས་ཨོ་འབྱུང་། ཨི་ཉིད་བསྒྲིམས་ཤིང་ཚེག་དྲག་དང་སྦྱར་བ་ལས་རྀ། ཨི་ཉིད་ཀློད་དེ་འདྲེན་པ་ལས་ལྀ་འབྱུང་བས་སོ། །དེས་ན། ཨ་ཨི་ཨུ་རྀ་ལྀ་ཨེ་ཨོ། བཅས་བདུན་པོ་དེ་དག་ལ་རྩ་བའི་ཡི་གེ་དང་།་སྦྱར་བའི་ཡི་གེ་གཉིས་སུ་དབྱེ་ནས། སྔ་མ་གསུམ་རྩ་བ་དང་། ཕྱི་མ་བཞི་སྦྱར་བའི་ཡི་གེ་ཡིན་ནོ། །ཀ་ལ་སོགས་པ་བརྗོད་པའི་འབྲུ་ཐམས་ཅད་ཀྱང་རྩ་བའི་དབྱངས་ཨ་ཨི་ཨུ་གསུམ་ལས་འབྱུང་ཞིང་། ཕན་ཚུན་སྦྱར་བའི་ཡི་གེ་ནི། དབྱངས་ཙམ་མ་ཟད་གསལ་བྱེད་ལའང་ཡོད་པས།་དེས་ནས་དབྱངས་གསལ་ཡི་གེ་སྤྱིའི་རྩ་བ་ལ། ཉེར་ལྔ་དང་། དེ་ཡང་བསྡུ་ན་བཅུ་གཅིག དེ་ཡང་བསྡུ་ན་བདུན། དེ་ཡང་བསྡུ་ན་གཅིག་ཏུ་འདུ་བ་ཡིན་ནོ།།
ཡི་གེའི་རྩ་བ་ཉེར་ལྔ་བཤད་པ། ཡི་གེའི་རྩ་བ་ཉེར་ལྔ་ནི། གསལ་བྱེད་ཀྱི་ནང་ནས། ཀ ཁ་ག་གྷ། ཅ་ཆ་ཇ་ཇྷ། ཊ་ཋ་ཌ་ཌྷ། ཏ་ཐ་ད་དྷ། པ་ཕ་བ་བྷ། ཧ། ཀྵ། དབྱངས་ཡིག་ལས། ཨ་ཨི་ཨུ། བཅས་བསྡོམས་པས་ནེར་ལྔ་སྟེ། སྡེ་བ་ལྔའི་ཡི་གེ་དང་པོ་བཞིའི་ཐོག དྲོ་བ་གཅིག མཐའ་ཟད་གཅིག་བསྣན་པའི་གསལ་བྱེད་ཉེར་གཉིས་དང་། དབྱངས་ཀྱི་རྩ་བ་གསུམ་བཅས་ཡིན་ནོ། །འོ་ན། དབྱངས་ཡིག་ལྷག་མ། རྀ་ལྀ་ཨེ་ཨོ། བཞི་པོ་ཡི་གེའི་རྩ་བར་མི་བགྲངས་པའི་རྒྱུ་མཚན་གང་ཡིན་སྙམ་ན། དེ་དག་ནི་གོང་དུ་ཞུས་པ་ལྟར། ཕན་ཚུན་སྦྱར་བ་ལས་བྱུང་བས་རྩ་བར་མི་ཏད་དོ།་ཕན་ཚུན་སྦྱར་ལུགས་ཀྱང་། ཨེ་ནི་ཨ་དང་ཨི་སྦྱར་བ་ལས་བྱུང་བ་དང་། ཨོ་ནི་ཨ་དང་ཨུ་སྦྱར་བ་ལས་བྱུང་།་རྀ་ནི་ཨི་ཉིད་བསྒྲིམས་ཤིང་ཚེག་དྲག་པ་ལས་བྱུང་། ལྀ་ནི་ཨི་ཉིད་ཀློད་པས་འདྲེན་པ་གོང་དུ་ཞུས་པ་ལྟར་རོ། །གསལ་བྱེད་སོ་བཞི་ལས། ཉེར་གཉིས་རྩ་བར་བགྲངས་ནས།་ལྷག་མ། ང་ཉ་ཎ་ན་ཥ། ཡ་ར་ལ་ཝ། ཤ་ཥ་ས། བཅས་རྩ་བར་མ་བགྲངས་པའི་རྒྱུ་གང་ཡིན་ཞེ་ན། གསལ་བྱེད་བཅུ་གཉིས་པོ་དེ་དག་ཕན་ཚུན་སྦྱར་བ་ལས་འབྱུང་བས་རྩ་བར་མ་བགྲངས་སོ། །ཇི་ལྟར་སྦྱར་བའི་ཚུལ་ཡང་། ང་ཉ་ཎ་ན་མ་ལྔ་ནི། ཨེ་དང་ཨ་སྣ་ལྡན་འདུས་པ་ལས་བྱུང་། ཡ་ནི། ཨི་དང་ཨ་སྦྱར་བ་ལས་བྱུང་། ར་ལ་གཉིས་ནི། ཨ་ཉིད་བསྒྲིམ་པ་དང་ཀློད་པའི་ཁྱད་པར་ལས་བྱུང་། ཝ་ནི། ཨུ་དང་ཨ་སྦྱར་བ་ལས་བྱུང་། ཤ་ཥ་ས་གསུམ་ནི། ར་དང་མཐུན་པས་ཨ་ཉིད་བསྒྲིམས་ཤིང་ཚེག་དྲག་དང་སྦྱར་ནས་བྱུང་བས་སོ། །དེ་དག་བསྡུ་ན་ཡི་གེའི་རྩ་བ་བཅུ་གཅིག་ཏུ་འདུ་བ་ཡིན་ནོ།།
ཡི་གེའི་རྩ་བ་བཅུ་གཅིག་ཏུ་བཤད་པ། གོང་དུ་བཤད་པའི་ཡི་གེའི་རྩ་བ་དེ་དག་བསྡུ་ན་བཅུ་གཅིག་ཏུ་འདུ་སྟེ། ཀ་ཁ། ཅ་ཆ། ཊ་ཋ། ཏ་ཐ། པ་ཕ། ཧ། བཅས་སུ་འདུ་བས་སོ། །འདུ་ལུགས་ནི། ག་ཇ་ཌ་ད་བ་ལྔ་ནི། ཀ་ཅ་ཊ་ཏ་པ་ལྔའི་སྒྲ་ནས་བྱུང་ཞིང་། གྷ་ཇྷ་ཌྷ་དྷ་བྷ་ལྔ་ནི། ག་ཇ་ཌ་ད་བ་ལྔ་ཧ་དང་ཚོགས་པ་ལས་བྱུང་བས། ཡི་གེའི་རྩ་བ་ལས་བཏོན་ནས། ལྷག་མ་བཅུ་གཅིག་ཁོ་ན་ཡི་གེའི་རྩ་བར་འཇོག་གོ།དེ་དག་ཀྱང་བསྡུ་ན་རྩ་བ་བདུན་དུ་འདུ་བ་ཡིན་ནོ།།
ཡི་གེའི་རྩ་བ་བདུན་ནི། ཨ་ཀ་ཅ་ཊ་ཏ་པ་ཧ། བཅས་ཡིན་ནོ། །དེ་དག་རྩ་བར་འཇོག་པའི་རྒྱུ་མཚན་ནི་གོང་གི་ཁ་ཆ་ཋ་ཐ་ཕ་ལྔ་པོ་ཡང་། རང་རང་གི་སྡེ་པའི་ཡི་གེ་དང་པོ། ཀ་ཅ་ཊ་ཏ་པ་སྟེ་ལྔ་པོ་དེ་དག་ལས་བྱུང་བས་སོ། །དེ་ནི་ཀ་སོགས་རྩ་བ་དེ་དག་གི་ཡང་རྩ་བ་ཡིན་པས། དེས་ན་ཡི་གེའི་རྩ་བར་བདུན་དུ་འཇོག་གོ། དེ་དག་ཀྱང་བསྡུ་ན་གཅིག་ཏུ་འདུའོ།།
ཡི་གེའི་རྩ་བ་ཉག་གཅིག་ནི། ཨ་ཡིག་ཁོ་ན་ཏེ། དེ་ནི་དབྱངས་གསལ་ཡི་གེ་མཐའ་དག་པའི་བརྗོད་པའི་རྩ་བ་མཐའ་ཐུག་པ་དེ་ཡིན་ནོ།། ཇི་སྐད་དུ། རྗེ་ས་པཎ་གྱིས། ཨ་ནི་ཡིག་འབྲུ་ཀུན་གྱི་མཆོག། མིང་ཚིག་རབ་ཏུ་གསལ་བར་བྱེད།། ཁོང་ནས་འབྱུང་བ་སྐྱེ་མེད་པའོ།།[3]ཞེས་དང་། སེངྒེ་ལྟ་བུ་ཨ་ཞེས་བྱ།།ཞེས་གསུངས་པའི་ཕྱིར།
རྣམ་པར་བཞག་པ་འདི་ཉིད་ལ་དཔལ་ལོ་ཆེན་མོ་བློ་གྲོས་བསྟན་པའི་ཚོགས་གསུམ་གསལ་བ་ལས། སྨྲ་སྒོའི་འགྲེལ་བ་ལ་སོགས་པར་བསྡུ་བའི་ཚུལ་དུ་མ་ནི་ཡི་གེ་ཉེར་ལྔ་དང་བཅུ་གཅིག་དང་བདུན་དུ་དབྱངས་རྣམས་དང་གསལ་བྱེད་ཐམས་ཅད་འདུས་ཤིང་། དེ་ཡང་ཨ་(ཨུ)རུ་འདུས་ཞེས་འཆད་པ་ནི་སྙིང་བོ་མེད་པ་སྟེ། གསལ་བྱེད་དབྱངས་སུ་འདུས་ཞེས་སྨྲ་བ་ནི་གྱང་རི་མོར་འདུས་ཞེས་པ་དང་འདྲའོ༎ གཞན་ཡང་དེ་ན་དཔྱད་མི་བཟོད་པ་མང་བོ་སྣང་སྟེ་རང་བཟོས་བླུན་པོ་མགོ་བསྐོར་བའོ།། ཞེས་གསུངས།

༢ རྩ་བ་བདུན་ལས་དབྱངས་ཡིག་བཅུ་དབྱངས་ཡིག་བཅུ་དྲུག་ཏུ་འགྱུར་ཚུལ་བསྟན་པ།
དྲང་དང་བཀུག་དང་སྨད་པ་དང་།།
བསྒྲིམས་པ་དང་ནི་ཀློད་པ་ལ།།
གྲྭར་དང་ཙྭང་གིས་ཕྱེ་བ་དང་།།
བསྒྲེང་དང་བསྒྲེང་སྟེ་བཀུག་པ་དང་།།
བསྟོད་དང་བསྟོད་དེ་སྨད་པ་དང་།།
སྣ་ལྡན་རྣམ་པར་གཅོད་པ་ཡིས།།
ང་རོ་བཅུ་དྲུག་དག་ཏུ་འདོད།།
དབྱངས་ཡི་ག་གོང་དུ་བཤད་པའི་རྩ་བ་བདུན་ལས་ཕྱེས་པའི་དབྱེ་བ་བཅུ་དྲུག་ཏུ་འགྱུར་ཏེ། བཅུ་དྲུག་གང་དང་གང་ཞེ་ན། དྲང་པ་ཨ་དང་།་བཀུག་པ་ཨི་དང་། སྨད་པ་ཨུ་དང་། བསྒྲིམས་པ་རྀ་དང་ནི། ཀློད་པ་ལྀ། བཅས་ལྔ་པོ་དེ་དག་ལ། གྲྭར་ཏེ་རིང་པོ་དང་། ཙྭང་སྟེ་ཐུང་ངུ་གཉིས་སུ་ཕྱེ་བས། ཨ་ཨི་ཨུ་རྀ་ལྀ་ཨཱ་ཨཱི་ཨཱུ་རཱྀ་ལཱྀ་བཅས་བཅུ་དང་། སྒྲེང་པ་ཨེ་དང་། བསྒྲེང་སྟེ་བཀུག་པ་ཨཻ་དང་། བསྟོད་པ་ཨོ་དང་། བསྟོད་དེ་སྨད་པ་ཨཽ་དང་། སྣ་ལྡན་གྱི་ཨཾ།་རྣམ་པར་གཅོད་པ་ཨ༔སྟེ།་བསྡོམས་པས་དབྱངས་ཀྱི་ང་རོ་བཅུ་དྲུག་དག་ཏུ་འདོད། །དེས་ན།་ཨ་ཨཱ་ཨི་ཨཱི་ཨཱུ་རྀ་རཱྀ་ལྀ་ལཱྀ་ཨེ་ཨཻ་ཨོ་ཨཽ་ཨཾ་ཨ༔། བཅས་བཅུ་དྲུག་ལ་འཕགས་ཡུལ་གྱི་དབྱངས་ཡིག་བཅུ་དྲུག་ཞེས་བྱའོ།། ཀ་ལཱ་པའི་སྒྲ་མདོར། དབྱངས་ཡིག་བཅུ་བཞིར་བགྲངས་པ་ནི། ཨཾ་སྣ་ལྡན་དང་། ཨ༔རྣམ་བཅད་གཉིས་མི་བརྩི་པས་ཡིན་ནོ།། དེ་གཉིས་མི་བགྲངས་པའི་རྒྱུ་མཚན་ཡང་། སྣ་ལྡན་དང་རྣམ་བཅད་ནི་གསལ་བྱེད་ཀྱི་ཁོངས་སུ་འདུ་ཞིང་ཨ་ཡིག་ནི་དེ་གཉིས་ཀྱི་བརྟེན་གཞི་ཙམ་ལས། རང་གི་ངོ་བོ་དངོས་ནི་ཨ་ཡིག་གི་ནང་དུ་འདུ་བས་སོ།  །དཔང་ལོ་ཆེན་པོས་ཀྱང་། དབྱངས་ནི་བཅུ་བཞི་གསལ་བྱེད་ནི།།སུམ་ཅུ་གསུམ་དུ་མཁས་པས་གསུངས།། ཞེས་དང་། དབྱངས་རྣམས་བཅུ་བཞི་སྟེ། ཨ་ཨཱ། ཨི་ཨཱི། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽའོ།། ཞེས་དང་། གསང་སྔགས་ཀྱི་རྒྱུད་སྡེ་འགའ་ཞིག་ཏུ་གསུངས་པ་དང་། སྤྱིར་ཡི་གེས་རྩེན་པ་རྣམས་ལ་ཨཾ་ཨཿགཉིས་བསྣན་པས་དབྱངས་བཅུ་དྲུག་ཅེས་གྲགས་ཏེ། །གཉིས་སུ་ཕྱེ་བ་ནི་རྣམ་པར་ཕྱེ་བ་ཙམ་ཡིན་གྱི་རིགས་བཅུ་བཞི་བོ་ལས་གཞན་པ་མེད་དོ།། ཞེས་གསུངས་སོ།། འོ་ན་གོང་གི་དབྱངས་ཡིག་བཅུ་བཞི་ལས་ལྀ་དང་ལཱྀ་གཉིས་ཀ་མི་དགོས་ཏེ། སཾསྐྲྀ་ཏའི་སྐད་དུ་ལ་ཡིག་ནི་ཀླྀཔྟ་ཞེས་པ་ལས་གཞན་ན་མེད་ཅིང་། དེ་ཉིད་མདོ་གཞན་གྱིས་བཀག་པ་དང་། ལྀ་ལ་རིང་བ་(ལཱྀ)་མེད་པས་བཅུ་གཉིས་སུ་འགྱུར་རོ་ཞེ་ན། མ་ཡིན་ཏེ། སློབ་དཔོན་ཆོས་འབངས་ཀྱིས། ལྕེ་མི་བདེ་བས་རྀ་ཡིག་ལྀ་རུ་བརྗོད་པ་ལ་དཔྱས་པ་ན། ལྀ་ཡིག་ཉེ་བར་མཁོའོ་ཞེས་དང་། སློབ་དཔོན་བགྲོད་སེང་གེས། ཇི་ལྟར་རྗེས་ཟློས་བྱེད་པས་དཔྱས་པ་ལ་ལྀ་ཡིག་ཐུང་ངུ་ཡོད་པ་ལྟར་དེ་ལ་རིང་བོའང་ཡོད་དོ་ཞེས་འཆད་དོ། །[4]
དཔལ་དུས་ཀྱི་འཁོར་ལོའི་རྒྱུད་ལས། ཨ་ཨི་ཨུ་རྀ་ལྀ། ཨཱ་ཨཱི་ཨཱུ་རཱྀ་ལཱྀ། ཨ་ཨེ་ཨར྄་ཨོ་ཨལ྄། ཨཱ་ཨཱེ་ཨཱར྄་ཨཽ་ཨཱ་ལ྄། ཧ་ཡ་ར་ཝ་ལ། ཧཱ་ཡཱ་རཱ་ཝཱ་ལཱ། བཅས་དབྱངས་སུམ་ཅུར་གསུངས་པ་ནི། ལུང་དུ་སྟོན་པའི་མདོའི་སྤྱི་སྐད་དང་མི་མཐུན་པས། རྣམ་བཞག་གཞན་དུ་ཤེས་པར་བྱ་དགོས་ཏེ། དཔང་ལོ་ཆེན་པོས། གང་ཡང་དཔལ་དུས་ཀྱི་འཁོར་ལོར། ཨ་ཨི་རྀ་ཨུ་ལྀ་ཞེས་པ་དབྱངས་ཐུང་ངོ་ལྔ་དང་ཨཱ་ཨཱི་ཨཱུ་རཱྀ་ལཱྀ་ཞེས་རིང་བོ་ལྔ་དང་། དེ་ལྔའི་རིམ་པ་བཞིན་གྱི་ཡོན་ཏན་ཨ་ཨེ་ཨར྄་ཨོ་ཨལ྄་ཞེས་པ་དབྱངས་ཐུང་ངུ་ཞེས་པ་དང་། དེ་ལྔ་འཕེལ་བ་ཨཱ་ཨཱེ་ཨཱར྄་ཨཽ་ཨཱ་ལ྄་དང་། དེ་ལྔའི་ཡ་ཎར་བསྒྱུར་བ་ཐུང་བ་ཧ་ཡ་ར་ཝ་ལ་ཞེས་པ་དང་། དེ་རིང་བ་ཧཱ་ཡཱ་རཱ་ཝཱ་ལཱ་ཞེས་པ་སྟེ། དབྱངས་སུམ་ཅུར་གསུངས་པ་ནི་རྣམ་པར་གཞག་པར་གཞན་ཁོ་ན་ཡིན་པས་སྤྱི་སྐད་དང་མི་མཐུན་ཏེ། ཡོན་ཏན་དང་འཕེལ་བའི་ཨ་ཡིག་གསུམ་དང་། ཨཱ་ཡིག་གསུམ་རྣམས་ཨའི་ཡི་གེ་རུ་འདུས་ཤིང་། ར་ལ་དབྱངས་མེད་དང་ཧ་སོགས་བཞི་གསལ་བྱེད་ཡིན་པའི་ཕྱིར་རོ། །ཞེས་གསུངས་པས་སོ།།

 དབྱངས་ཀྱི་རྩ་བ་དེ་དག་རེ་རེ་ལའང་གསལ་བྱེད་བཅོ་བརྒྱད་དུ་འགྱུར་ཚུལ་བསྟན་པ།  
ང་རོ་དག་གི་གསལ་བྱེད་ནི།།
དྲང་པོ་བཀུག་དང་སྨད་པ་དང་།།
འདྲེན་པ་རིང་ཐུང་གསུམ་ཡོད་དེ།།
དེ་ལའང་ཆེ་འབྲེང་རྣམ་པ་གསུམ།།
དེ་དག་སྣ་ལྡན་བཅོ་བརྒྱད་དོ།།
དབྱངས་ཀྱི་རྩ་བ་དེ་དག་རེ་རེ་ལའང་སྒྲའི་ང་རོ་གསལ་བར་བྱེད་པ་བཅོ་བརྒྱད་དང་བཅུ་གཉིས་སུ་འགྱུར་བ་ཡིན་ཏེ། དང་པོ་ང་རོ་དག་གི་གསལ་བྱེད་བཅོ་བརྒྱད་དུ་འགྱུར་ཇི་ལྟར་ཡིན་ཞེ་ན། དབྱངས་ཀྱི་ཡི་གེ་དེ་དག་གསལ་བྱེད་ནི་དྲང་པོ་ཨ་དང་། བཀུག་པ་ཨི་དང་། སྨད་པ་ཨུ་དང་གསུམ་མོ། །ཨ། ཨི་ཨུ་སྟེ་དབྱངས་ཀྱི་རྩ་བ་གསུམ་པ་དེ་དག་རེ་རེ་ལ། སྒྲའི་འདྲེན་པ་ཐུང་ངུ་དང་། རིང་པོ། ཤིན་ཏུ་རིང་པོ་གསུམ་དུ་དབྱེ་བས་དྲུག་ཏུ་འགྱུར་ལ། དྲུག་པོ་དེ་དག་ལའང་ཆེན་འབྲིང་ཆུང་གསུམ་དབྱེ་བས་དགུར་འགྱུར་རོ། དགུ་པོ་དེ་དག་སྣ་ལྡན་ལྔ་པོ་གང་རུང་དང་ལྡན་མི་ལྡན་གཉིས་སུ་དབྱེ་བས་བཅོ་བརྒྱད་དོ།། བཅོ་བརྒྱད་པོ་དེ་དག་ཀྱང་། ཨ། ཨི། ཨུ། གསུམ་གྱིས་ཕྱེས་པས་དབྱངས་ཡིག་ལྔ་བཅུ་ང་བཞིའོ།། འོ་ན། ཐུང་ངུ་དང་། རིང་པོ། ཤིན་ཏུ་རིང་པོ་གསུམ་གྱི་གོ་དོན་ཇི་ལྟར་ཡིན་ཞེ་ན། དེ་ལ་ཐུང་ངུ་ནི་ཧྲར་སྭ་ཞེས་བྱ་བ་སྟེ། དོན་གྱི་སྒྲའི་ཐ་མལ་ཏེ་བརྗོད་པའི་དུས་ཡུན་ཧ་ཅང་ཐུང་བ་ལའོ།། རིང་པོ་ནི་དཱིརྒྷ་ཞེས་བྱ་བ་སྟེ།་དོན་ནི་བརྗོད་པའི་དུས་ཡུན་གཉིས་དང་ལྡན་པས་རིང་བའོ།། ཤིན་ཏུ་རིང་བ་ནི་པཱུ་ཏ་ཞེས་བྱ་བ་སྟེ། དོན་ནི་བརྗོད་པའི་དུས་ཡུན་གསུམ་དང་ལྡན་པས་ཤིན་ཏུ་རིང་བའོ།། འོ་ན་ཆེན་འབྲིང་ཆུང་གསུམ་གྱི་དོན་ཇི་ལྟར་ཡིན་ཞེ་ན། དེ་ལ་ཆེན་པོ་ནི་ཨུདཱཏྟ་ཞེས་བྱ་བ་སྟེ། ཡི་གེ་གཉིས་ཀྱི་སྒྲ་དང་ལྡན་པས་ཆེན་པོ་ཞེས་བྱའོ།། འབྲིང་ནི་སྭ་རི་ཏ་ཞེས་བྱ་བ་སྟེ། ཡི་གེ་ཕྱི་མོ་གཅིག་གི་སྒྲ་དང་ལྡན་པས་འབྲིང་ངམ་བར་མ་ཞེས་བྱའོ།། ཆུང་ངུ་ནི་ཨནཱུ་ཏཏྟ་ཞེས་བྱ་བ་སྟེ། ཡི་གེ་ཕྱེད་ཀའི་སྒྲ་དང་ལྡན་པས་ཆུང་ངུ་ཞེས་བྱའོ།། གསུམ་པོ་དེ་དག་གི་ཁྱད་པར་ནི། འོག་ཏུ་འཆད་འགྱུར་གྱི། ཨུཏཏྟ་ནི་མཚུངས་གཉིས་གཅིག།་ཞེས་པའི་སྐབས་དུ་འབྱུང་ལ། དེས་ན་ཆེན་ཆུང་གི་དབྱེ་བ་ནི་རིང་ཐུང་གི་ཁྱད་པར་དང་མི་འདྲ་སྟེ། འདིར་ཆེན་ཆུང་གི་ཐ་སྙད་ནི་ཡི་གེ་སྲབ་མཐུག་གིས་ཕྱེ་བ་ཡིན་ལ། རིང་ཐུང་ནི་བརྗོད་པའི་དུས་ཡུན་ལ་བརྟེན་ནས་འཇོག་པས་སོ།།
༤ དེ་ལས་གསལ་བྱེད་བཅུ་གཉིས་སུ་འགྱུར་ཚུལ།
གསལ་བར་བྱ་བ་འདི་ལྟ་སྟེ།།
བསྒྲེང་དང་བསྟོད་ལ་ཐུང་བ་སྟེ།།
བསྒྲིམས་དང་ཀློད་ལ་རིང་བའོ།།
བཅུ་གཉིས་ཡིན་ཏེ་བརྒྱ་རྩ་གཉིས།།
དམིགས་བསལ་བཅུ་གཉིས་སུ་འགྱུར་བའི་རིགས་ལ་གསལ་བར་བྱ་བ་འདི་ལྟ་སྟེ། བསྒྲེང་པ་ཨེ་དང་། བསྟོད་ཨོ་ལ་གཉིས་ལ་ཤིན་ཏུ་རིང་པོ་དང་རིང་པོ་གཉིས་ལས་ཐུང་བ་གསལ་བར་བྱ་སྟེ། དེ་ལྟ་ན། དབྱངས་ཡིག་ཨེ་ལ། རིང་པོ་དང་ཤིན་ཏུ་རིང་པོ་གཉིས་སུ་དབྱེ་ཞིང་། དེ་ལའང་ཆེན་འབྲིང་ཆུང་གསུམ་དུ་དབྱེ་བས་དྲུག་ཏུ་འགྱུར་རོ། །དྲུག་པོ་དེ་དག་ལ་སྣ་དང་ལྡན་པ་དང་མི་ལྡན་པ་གཉིས་སུ་དབྱེ་བས་བཅུ་གཉིས་སུ་འགྱུར་བ་ཡིན་ནོ།། དེས་ཨོ་ཡིག་ལའང་རིགས་བསྒྲེས་ཏེ། ཉེར་བཞིར་འགྱུར་རོ།། འོ་ན།་ཨེ་དང་། ཨོ་གཉིས་ལ་ཐུང་ངུ་གསལ་བའི་རྒྱུ་མཚན་གང་ཡིན་ཞེ་ན། ཨེ་དང་ཨོ་གཉིས་ལ་རང་བཞིན་གྱིས་ཐུང་ངུའི་སྒྲའམ་ང་རོ་དང་མི་ལྡན་པའི་ཕྱིར་རོ། །དེ་བཞིན་དུ་བསྒྲིམས་པ་རྀ་དང་། ཀློད་ལ་ལྀ་གཉིས་ལ་ཤིན་ཏུ་རིང་བ་སྤང་ནས། ཐུང་ངུ་དང་། རིང་པོས་དབྱེ་བས་གཉིས་སུ་འགྱུར་བ་དེ་ལའང་ཆེན་འབྲིང་ཆུང་གསུམ་དུ་ཕྱེས་པས་བཅུ་གཉིས་སུ་འགྱུར་བ་ཡིན་ནོ། །འོ་ན། རྀ་ལྀ་གཉིས་ལ་ཤིན་ཏུ་རིང་པོ་གསལ་བའི་རྒྱུ་མཚན་གང་ཡིན་ཞེ་ན། ཤོང་སྟོན་གྱིས། རྀ་ཡི་སྒྲ་ཤིན་ཏུ་རིང་པོར་བརྗོད་ན་ཨི་སྒྲར་འགྱུར་རོ། །ཞེས་གསུངས་ཤིང་། འཇམ་མགོན་ས་པཎ་གྱིས། ལྀ་རྒྱུད་མེད་ཅེས་བྱ་བ་ཡིན་པས་རིང་བ་མེད་མོད་ཀྱི། ཤིན་ཏུ་རིང་པོ་ཡོད་ལ། རྀ་ལ་ནི་གསུམ་ཀ་ཡོད་དོ། །ཞེས་གསུངས་པ་གཞུང་འདི་དང་འགལ་ཡང་། སྡེབ་སྦྱོར་གྱི་བསྟན་བཅོས་ཀྱི་ལུགས་སུ་དགོངས་པ་སེམས་སོ། །དེས་ན།་ཨ་ཨི་ཨུ་གསུམ་ལ་ཕྱེས་པས་ལྔ་བཅུ་ང་བཞི་དང་། རྀ་ལྀ་ཨེ་ཨོ་བཞི་ལ་ཕྱེས་པའི་བཞི་བཅུ་ཞེ་བརྒྱད་དེ། ཡོངས་སུ་བསྡོམས་པས་བརྒྱ་རྩ་གཉིས་སུ་གྲུབ་པ་ཡིན་ནོ།།
འོ་ན། གོང་དུ་དབྱངས་ཡིག་བཅུ་དྲུག་ཏུ་བཤད་ཀྱང་། འདིར་གསལ་བའི་དབྱེ་བ་རེ་རེ་བཞིན་འཆད་པའི་སྐབས་སུ་དབྱངས་ཡིག་བཅུ་བཞི་ལས་མ་གསུངས་པའི་རྒྱུ་མཚན་གང་ཡིན་ཞེ་ན། དབྱངས་ཡིག་དེ་དག་བསྡུ་ན་བཅུ་བཞིར་འདུ་བར་དགོངས་ནས་མ་འཆད་པ་ཡིན་ནོ། ཇི་ལྟར་འདུ་བའི་ཚུལ་ཡང་། རྗེས་སུ་ང་རོ་ལ་སྣ་ལྡན་གྱི་མིང་གིས་བཏགས་ནས་དབྱངས་ཡིག་བཅུ་བཞིར་སྦྱོར་དུ་རུང་བས་སོ། དེར་བརྟེན་སྣ་ལྡན་ལོགས་སུ་མ་བགྲངསཤིང་། རྣམ་བཅད་ཀྱི་དབྱེ་བ་ལོགས་སུ་མི་འདྲེན་པའི་རྒྱུ་མཚན་ཡང་སྣ་ལྡན་གྱི་སྦྱོར་ཚུལ་ལ་དཔགས་ནས་ཤེས་ནུས་པར་དགོངས་པ་ཡིན་ལ། གཞན་ཡང་རྣམ་བཅད་ནི་གསལ་བྱེད་ཀྱི་ཁོངས་སུ་འདུ་ཞིང་། ཨ་ཡིག་ནི་དེའི་བརྟེན་གཞི་ཙམ་ལས་དོན་ལ་རྩ་བའི་དབྱངས་ཀྱིས་བསྡུས་པས་ཀྱང་ཡིན་ནམ་སྙམ་སྟེ་དཔྱད་པ་འཚལ།
༥༽ ཡི་གེ་སྤྱིའི་རྣམ་པའི་དབྱེ་བ་བསྟན་པ།
སྤྱི་ན་བརྒྱ་དང་བཅུ་རྩ་གཅིག།
རང་གནས་དང་ནི་བཅུ་གཉིས་སོ།།
ཡི་གེ་གཅིག་གིས་རྣམ་པའི་ཆ།།
ངག་གི་འདུ་བྱེད་ཚོགས་པའོ།།
དུས་གཅིག་ཏུ་ནི་བཅུ་གཅིག་གམ།།
སྣ་དང་ལྡན་པ་བཅུ་གཉིས་ཏེ།།
རང་གི་གནས་དང་བཅུ་གསུམ་མོ།།
ཀ་ཡིག་ལྟ་བུ་ཡི་གེ་རེ་ལ་དབྱངས་ཡིག ཨ། ཨི། ཨུ། ཞུགས་ཤིང་། དབྱངས་ཡིག་རེ་རེ་ལ། ཐུང་ངུ་དང་། རིང་པོ། ཤིན་ཏུ་རིང་པོ། གསུམ་དུ་དབྱེ། དེ་རེ་རེ་ལའང་ཆེ་འབྲིང་ཆུང་གསུམ་དུ་དབྱེ་བས། ལྔ་བཅུ་ང་བཞི། རྀ། ལྀ། གཉིས་ལ་ཤིན་ཏུ་རིང་བ་ཆེ་འབྲིང་ཆུང་གསུམ་དོར། ཨེ། ཨོ། གཉིས་ལ་ཐུང་བ་ཆེ་འབྲིང་ཆུང་གསུམ་དོར་བས། ལྷག་མ་རྣམས་གོང་དང་མཚུངས་པར་ཕྱེ་ཞིང་འགྱུར་བས། བཞི་བཅུ་ཞེ་བརྒྱད་དེ། བསྡོམས་པས་བརྒྱ་དང་རྩ་གཉིས་ཐོག སྐྱེ་བའི་གནས་བརྒྱད་དང་།་བྱེད་པའི་རྐྱེན་ལས་གང་ཡང་རུང་བ་གཅིག་སྟེ་དགུ་བསྣན་པས། བརྒྱ་དང་བཅུ་གཅིག་ཏུ་འགྱུར་ལ། རང་གནས་ཀྱི་སྐྱེད་པ་གཙོ་ཆེ་བ་དེ་ཉིད་བགྲངས་པས་བརྒྱ་དང་བཅུ་གཉིས་སུ་འགྱུར་བའོ།།
ཀ་ལ་སོགས་པ་དབྱངས་གསལ་གཉིས་སུ་ཕྱེ་བའི་གསལ་བྱེད་ཡི་གེ་རེ་རེར་ཡང་། དུས་གཅིག་ཏུ་ཐུན་མོང་བ་སྐྱེ་བའི་གནས་བརྒྱད་དང་། བྱེད་པའི་རྐྱེན་གྱི་རྣམ་པ་གང་ཡང་རུང་བ་གཅིག དབྱངས་ཀྱི་ང་རོའི་གསལ་བྱེད་རིང་ཐུང་གསུམ་ལས་གང་ཡང་རུང་བ་གཅིག དེ་ལ་ཆེ་འབྲིང་ཆུང་གསུམ་དུ་ཕྱེ་པའི་གང་ཡང་རུང་བ་གཅིག་སྟེ་བཅུ་གཅིག་དང་། དེ་ལ་སྣ་ལྡན་བསྣན་ཚེ་བཅུ་གཉིས་སོ། །དེའི་ཐོག་རང་གི་སྐྱེ་གནས་གཙོ་བོ་བསྣན་པས་བཅུ་གསུམ་མོ། །དེ་ཡང་རང་ཉིད་གང་ལས་སྐྱེས་པའི་སྐྱེ་གནས་གཙོ་བོ་ཤས་ཆེ་བའི་དབང་དུ་བྱས་ཀྱི། དེ་ཉིད་སྐྱེ་གནས་བརྒྱད་ཀྱི་ནང་དུ་མ་འདུས་མེད་དོ། 
སྡེབ་སྦྱོར་རིན་ཆེན་འབྱུང་གནས་ལས་ནི། གསལ་བྱེད་རྣམས་ནི་སུམ་ཅུ་བདུན། འདི་ནི་དབྱངས་ཡིག་ཉི་ཤུ་གཉིས། འདི་རྣམས་ཡི་གེ་ལྔ་བཅུ་དགུ ཞེས་གསུངས་པས། ཨ་ཨི་ཨུ་རྀ་བཞི་ལ་ཐུང་ངུ་དང་གསུམ་ཡིག་གི་ཉ྄་རྟགས་ཀྱིས་མཚོན་པའི་ཤིན་ཏུ་རིང་དང་། ལྀ་ལ་རིང་བོ་མེད་པས་གཉིས་དང་། ཨེ་ཨཻ་ཨོ་ཨཽ་རྣམས་ལ་ཐུང་ངུ་མེད་པས་གཉིས་གཉིས་ཏེ།- བསྡོམས་པས་དབྱངས་ཉི་ཤུ་རྩ་གཉིས་སོ། གསལ་བྱེད་ནི་སྔར་བཤད་པའི་སུམ་ཅུ་རྩ་གསུམ་(མཐའ་ཟད་ཕུད་པའི)དང་རྗེས་སུ་ང་རོའི་མིང་ཅན་ཀླད་གོར་དང་། རྣམ་པར་གཅད་བྱའི་མིང་ཅན་ཚེག་དྲག་དང་། ལྕེ་རྩ་ཅན་གྱི་མིང་ཅན་ཀ་དང་ཁའི་སྟེང་དུ་འབྱུང་བའི་ ཌ་མ་རུའི་རྣམ་པ་ཅན་ྈྐ་ྈྑ་ཞེས་པ་ལྟ་བུ་དང་། མཆུ་དང་ཉེ་བ་ཅན་པ་དང་ཕའི་སྟེང་དུ་འབྱུང་བའི་གླང་བོ་ཆེའི་མྱོས་བུམ་གྱི་རྣམ་པ་ཅན་ྉྤ་དང་ྉྥ་ཞེས་པ་ལྟ་བུ་སྟེ་སུམ་ཅུ་རྩ་བདུན་ནོ་ཞེས་བཤད་དོ། །དེ་དག་ལས་བཤད་སྲོལ་གཞན་པ་དཔང་ལོ་ཆེན་མོའི་ཚོགས་གསུམ་གསལ་བར། གཞན་པའང་ཅི་ལྟ་བུ་ཞེ་ན། ཨ་ཨི་ཨུ་རྀ་བཞི་རྣམས་ལ། ཐུང་རིང་པླུ་ཏ་གསུམ་གསུམ་སྟེ། །རེ་རེ་ལ་ཡང་ཨུ་དཏ་ཏ། །ཨ་ནུ་དཏ་སྭ་རི་ཏིའོ། །དབྱངས་ཀྱི་ཡི་གེ་བཞི་པོ་དེ་ལ་སོ་སོར་རེ་རེ་ལ་ཐུང་ངུ་དང་རིང་བོ་དང་པླུཏ་ཞེས་པའི་ཤིན་ཏུ་རིང་བོར་ཕྱེ་བས་གསུམ་གསུམ་སྟེ། དེ་གསུམ་རེ་རེ་ལའང་ཨུ་དཏྟ་དང་ཨནུ་དཏྟ་དང་སྭ་རི་ཏ་སྟེ་རེ་རེ་ལ་གསུམ་གསུམ་དུ་ཕྱེ་བས་དགུ་དགུའོ་། དེ་ཡང་སྣ་ལྡན་སྣ་མེད་དུ། །ཕྱེ་བས་བཅོ་བརྒྱད་རྣམས་སུ་འགྱུར། །དགུ་བོ་རེ་རེ་ལ་ཡང་སྣ་ལྡན་དང་སྣ་ལྡན་མ་ཡིན་པ་གཉིས་གཉིས་སུ་ཕྱེ་བས་ཨ་ལ་སོགས་པ་རེ་རེ་ཡང་བཅོ་བརྒྱད་དུ་འགྱུར་རོ། །མཚམས་སྦྱོར་ཡི་གེ་ཐུང་ངུ་མེད་། ལྀ་ཡིག་རིང་བོ་མེད་པས་ན། ལྔ་བོ་བཅུ་གཉིསབཅུ་གཉིས་སོ། ཨེ་ཨཻ་ཨོ་ཨཽ་རྣམས་མཚམས་སྦྱོར་གྱི་ཡི་གེའི་མིང་ཅན་ཡིན་ཞིང་དེ་བཞི་ལ་ཐུང་ངུ་མེད་ལ། ལྀ་ལ་རིང་བོ་མེད་པས་བཅུ་གཉིས་རེ་སྟེ། བསྡོམས་པས་བརྒྱ་དང་སུམ་ཅུ་གཉིས། བརྡ་སྤྲོད་པའི་གཞུང་ཆེ་བ་རྣམས་སུ་དབྱངས་བརྒྱ་སུམ་ཅུ་རྩ་གཉིས་སུ་བཤད་དོ།། ཞེས་ཀྱང་གསུངས་སོ།།
༦༽ངག་གི་འདུ་བྱེད་རྣམ་པ་བདུན་གྱི་དཔེ་ལུས་ཀྱི་སྒོ་ནས་བསྟན་པ།
མཚོན་འདེབས་གར་དང་ལས་བྱེད་དང་།།
སྟབས་འགྲོས་ལྟ་སྟངས་བྱེ་བྲག་དང་།།
རྐང་ལག་མིག་གི་འགྱུར་བག་གིས།།
ལུས་ཀྱི་འདུ་བྱེད་བདུན་པོ་ནི།།
ཐད་ཀར་ལྟ་དང་གྱེན་དུ་ལྟ།།
དེ་བཞིན་བཟློག་སྟེ་ལྟ་བ་དང་།།
བསྟོད་དེ་ལྟ་དང་སྨད་དེ་ལྟ།
བསགྲིམ་དང་ཀློད་དེ་ལྟ་བ་ལྟར།།
གང་ལ་སོགས་པ་འང་དེ་བཞིན་ཏེ།།
ལུས་ཀྱི་འདུ་བྱེད་བདུན་པོ་ལྟར།།
ངག་གི་འདུ་བྱེད་དེ་བཞིན་ནོ།།
ངག་གི་འདུ་བྱེད་དམ་དབྱངས་ཀྱི་ང་རོ་བདུན་པོ་དེ་དག་ལུས་ཀྱི་འདུ་བྱེད་བདུན་དང་མཐུན་པ་སྟེ། དཔའ་བོས་མཚོན་ཆ་འདེབས་པ་དང་། མཛེས་མས་གར་འཁྲབ་དང་། དེ་ལས་གཞན་ཡང་ལས་གང་ལ་བྱེད་པ་པོ་གང་གོས་བྱ་བ་གང་ཞིག་རྩོམ་པ་ན། དྲང་པོ་བྱེད་པ་དང་། བསྒྲེང་སྟེ་བྱེད་དང་། བཀུག་པ་དང་། བསྟོད་པ་དང་། སྨད་པ་དང་། བསྒྲིམས་པ་དང་། ཀློད་པ་སྟེ། བདུན་པོ་དེ་དག་གོ་སྒོ་ནས་རྩོམ་པར་བྱེད་དེ། དེ་དག་ལས་ལྷག་པའི་ལུས་ཀྱི་འདུ་བྱེད་རྩོམ་དུ་མེད་དོ། །དེ་ལས་རྐང་པའི་སྟབས་འགྲོས་ལྟ་བུ་དཔེར་མཚོན་ན། ཐད་ཀར་གོམ་པ་འདོར་བ་ནི་དྲང་པོ་དང་། སླར་ཡང་བཟློག་པའི༷་ཚུལ་གྱིས་འདོར་བ་ནི་བཀུག་པ་དང་། དེས་མཚོན་ནས་གོམ་པ་གྱེན་དུ་འདོར་བ་ནི་བསྒྲེང་པ་དང་། གོམ་པ་འཕང་བསྟོད་དེ་འདོར་བ་ནི་བསྟོད་པ་དང་། གོམ་པ་འཕང་སྨད་དེ་འདོར་བ་ནི་སྨད་པ། གོམ་པ་བསྒྲིམས་ཏེ་སྤོ་བ་ནི་སྒྲིམ་པ་དང་།་གོམ་པ་ཀློད་དེ་འདོར་བ་ནི་ཀློད་པའོ།། དེ་བཞིན་དུ་སྐྱེས་བུ་གང་ཞིག་གིས་ལྟ་བྱའི་ཡུལ་ཞིག་ལ་ལྟ་བའི་ཚེ། ལྟ་སྟངས་ཀྱི་འདུ་བྱེད་བདུན་དུ་ངེས་ཏེ། མིག་མི་འགྱུར་བར་ཐད་ཀར་ལྟ་བ་ནི་དྲང་པོར་ལྟ་བའོ།། བསྒྲེང་སྟེ་ལྟ་བ་ནི་བལྟ་བྱའི་གནས་ལས་གྱེན་དུ་ལྟ་བའོ།། བཀུག་སྟེ་ལྟ་བ་ནི་ཕྱོགས་གཞན་ནས་བསྐོར་ཞིང་བཟློག་སྟེ་ལྟ་བའོ།། བསྟོད་དེ་ལྟ་ནི་མིག་འཕང་བསྟོད་དེ་ལྟ་བའོ།། སྨད་དེ་ལྟ་བ་ནི་མིག་འཕང་སྨད་དེ་ལྟ་བའོ།། བསྒྲིམ་སྟེ་ལྟ་བ་ནི་མིག་གིས་སྟངས་བསྒྲིམ་སྟེ་ལྟ་བའོ།། ཀློད་དེ་ལྟ་བ་ནི་མིག་ལྟ་སྟངས་ཀློད་ནས་ལྟ་བའོ།། དེ་ལྟར་རྐང་པ་དང་། ལག་པ།་མིག་གི་འགྱུར་བག་དག་གིས། ལུས་ཀྱི་འདུ་བྱེད་བདུན་དུ་འགྱུར་བ་དེ་ལྟར། མཚོན་འདེབས་པ་དང་གར་ལ་སོགས་པ་འང་དེ་བཞིན་ཏེ། བྱེད་པོ་དང་བྱ་བ་གཉིས་དང་པོ་ཇི་ལྟར་གནས་པ་དེ་བཞིན་དུ་བྱེད་པ་ནི་དྲང་པོའོ། གྱེན་དུ་བྱེད་པ་ལྟ་བུ་ནི་བསྒྲེང་པའོ།། གཞན་ནས་བྱེད་པ་ལྟ་བུ་ནི་བཀུག་པའོ།། འཕང་བསྟོད་དེ་བྱེད་པ་ནི་བསྟོད་པའོ།། ཕང་སྨད་དེ་བྱ་བ་ནི་སྨད་པའོ།། བྱ་བར་བསྒྲིམ་ཏེ་བྱེད་པ་ནི་བསྒྲིམ་པའོ།། བྱ་བར་ཀློད་དེ་བྱེད་པ་ནི་ཀློད་པ་སྟེ། འདུ་བྱེད་བདུན་པོ་དེད་དག་ཇི་ལྟ་བ་དེ་བཞིན་དུ། དབྱངས་ཀྱི་ང་རོ་དག་ཀྱང་དྲང་པ་ནི་ཨ་དང་ལྡན་པའི་ཚོགས་རྣམས་སོ།། བསྒྲེང་པ་ནི་ཨེ་དང་ལྡན་པའོ།། བཀུག་པ་ནི་ཨི་དང་ལྡན་པའོ། བསྟོད་པ་ནི་ཨོ་དང་ལྡན་པའོ། སྨད་པ་ནི་ཨུ་དང་ལྡན་པའོ། བསྒྲིམ་པ་ནི་རྀ་དང་ལྡན་པའོ། ཀློད་པ་ནི་ལྀ་དང་ལྡན་པ་སྟེ།  ལུས་ཀྱི་འདུ་བྱེད་བདུན་པོའི་འགྱུ་བག་ཇི་ལྟ་བ་ངག་གི་འདུ་བྱེད་དག་ཀྱང་དེ་བཞིན་ནོ།། ཞེས་པ་སྟེ་གོ་སླའོ།།
 ༧ ངག་གི་འདུ་བྱེད་རྣམ་པ་བདུན་གྱི་དཔེ་ཡི་གེའི་དབྱིབས་ཀྱི་སྒོ་ནས་བསྟན་པ།
དེ་བསྟན་དབྱིབས་ཀྱི་གནས་ལུགས་ཀྱང་།།
མདའ་དང་གླང་ཆེན་བསེ་རུ་སྣ།།
གདུགས་དང་རྐང་བརྟེན་ལྟ་བུ་དང་།།
མེ་རི་ཆུ་ཡི་དཀྱིལ་འཁོར་ལྟར།།
ཐད་ཀ་ཟུར་དང་ཟུར་ལོག་དང་།།
སྟེང་འོག་རང་གི་ལུས་རྣམས་ལ།།
གནས་པའི་བརྡས་ནི་ཤེས་པར་བྱ།།
ངག་གི་འདུ་བྱེད་བདུན་པོ་དེ་དག་བསྟན་པའི་ཆེད་ཕྱི་རོལ་གཟུགས་དབྱིབས་ཀྱི་དཔེའི་སྒོ་ནས་དོན་ཀྱི་གནས་ལུགས་དག་ཀྱང་མཚོན་པར་བྱེད་དེ། ཇི་ལྟར་མཚོན་པ་ནི།་དེ་ཡང་དྲང་པོའི་ཡི་གེ་ནི་མདའ་དང་འདྲ་འོ། བསྒྲེང་པའི་ཡི་གེ་ནི་རི་དྭགས་བསེ་རུའི་རྭ་དང་འདྲ་བའོ།། བཀུག་པའི་ཡི་གེ་ནི་གླང་པོ་ཆེའི་སྣ་དང་འདྲ་བའོ།། བསྟོད་པའི་ཡི་གེ་ནི་གདུགས་དང་འདྲ་བའོ།། སྨད་པའི་ཡི་གེ་ནི་སྐྱེས་བུའི་རྐང་བརྟེན་ལྟ་བུའོ།། བསྒྲིམ་པའི་ཡི་གེ་ནི་མེ་རི་དང་འདྲ་བའོ།། ཀློད་པའི་ཡི་གེ་ནི་ཆུ་ཡི་དཀྱིལ་འཁོར་དང་འཕྱོ་བ་དང་འདྲ་སྟེ། དབྱིབས་གཟུགས་བདུནཔོ་དེ་དག་རང་རང་གི་སྒྲ་དང་མཐུན་པའི་བརྗོད་འདོད་ཀྱི་བརྡ་ཡང་མཚོན་པར་བྱེད་དེ། སྒྲ་དྲང་པོར་བརྗོད་བྱེད་ཀྱི་བརྡ་འམ་སྐུལ་སློང་ཡང་དྲང་པོ་སྟེ།་ལྷག་མ་དྲུག་ལའང་དེ་བཞིན་སྦྱར་རོ།། མཚོན་མ་དེ་དག་གི་གནས་ལུགས་ཀྱང་འདྲ་དང་འདྲ་བས་ནི་ཐད་ཀར་མཚོན་པ་དང་། བསེ་རུས་ཟུར་དང་། གླང་པོ་ཆེས་ཟུར་ནས་ལོག་དང་། གདུག་ནི་སྟེང་དང་། རྐང་རྟེན་གྱིས་འོག་དང་། མེ་རི་དང་ཆུའི་དཀྱིལ་གྱིས་རང་གི་ལུས་ལ་མཚོན་པ་སྟེ། ལེགས་སྦྱར་གྱི་ཡིག་གཟུགས་འབྲི་བའི་དབྱིབས་རིས་ཀྱང་འདི་ལས་བཤད་པ་དང་མཐུན་པའོ། །འདི་དག་གིས་ཀྱང་རྗོད་པའི་ངག་དང་དེ་བརྗོད་འདོད་ཀྱི་བརྡ་གཉིས་མཐུན་པར་བསྟན་ཏེ། དྲང་པོ་ལ་ཐད་ཀས་མཚོན་པའི་བརྡས་གཞན་ལའང་རིགས་བསྒྲེ་ནས་ཤེས་པར་བྱའོ།།
 ཡི་གེའི་རྒྱུ་བདུན་བཤད་པ།
དེས་བསྟན་བརྡ་ཅན་འབྱུང་བ་ན།།
ལྕགས་རྣམས་ལ་ནི་ཁབ་ལེན་བཞིན།།
རྣམ་རྟོག་དབང་གིས་རླུང་རྣམས་གཡོ།།
ཇི་ལྟར་གནས་གཞི་མེད་བཞིན་དུ།།
མཁའ་ལ་འདབ་བསྐྱོད་རླུང་འབྱུང་ལྟར།།
རྣམ་པར་རྟོག་པས་བསྐྱོད་པ་ན།།
པཱ་ཡ་ཏ་ཞེས་བྱ་བའི་རླུང་།།
ལུས་ལ་རབ་ཏུ་གཡོ་བར་འགྱུར།།
གཡོ་རླུང་རབ་ཏུ་གཡོས་པ་ཡིས།།
བྱེད་པ་ཀུན་ཏུ་བསྐྱོད་པས་ན།།
དོག་དང་ཡངས་པའི་གནས་རྣམས་སུ།།
ཕྲད་དང་ཅུང་ཟད་ཕྲད་པར་བྱེད།།
དེརའི་ཚེ་ནི༔ཤྭཱ་སྭཱ་ཞེས་པའི།།
རླུང་དང་ལྷན་ཅིག་འབྱུང་བ་སྟེ།།
ཇི་ལྟར་གསུགས་ལ་འབྱུང་བ་བཞིན།།
ང་རོ་ལ་ནི་བརྟེན་བཞིན་དུ།།
རྣམ་རྟོག་རང་གི་སྣང་ཆ་ལས།།
གཟུགས་བརྙན་བཞིན་དུ་ཆ་མཉམ་སྐྱེ།།
བརྗོད་འདོད་ཀྱི་བརྡ་དེས་བསྟན་པའི་བརྡ་ཅན་རྗོད་བྱེད་སྒྲ་རྣམས་རྒྱུ་བདུན་ཚོགས་པ་ལས་འབྱུང་ལ། རྒྱུ་བདུན་ནི། གནས་དང་། བྱེད་པ་དང་། རྣམ་རྟག་དང་། རླུང་དང་། ལྷན་ཅིག་འབྱུང་བའི་རྒྱུ་དང་། ཀུན་འགྲོ་རྒྱུ། སྐལ་མཉམ་རྒྱུ་དང་བདུན་ནོ།། དེ་དག་རིམ་པར་བཞིན་འཆད་པ་ལ། དཔེར་ན་ལྕགས་ནི་ཁབ་ལེན་གྱིས་གཡོ་བ་བཞིན་དུ་རྣམ་རྟོག་གིས་ལུས་ལ་གནས་པའི་རླུང་(བཱ་ཡ་ཏ)བསྐུལ་ནས་དེས་སྒྲ་འབྱུང་བའི་གནས་རྣམས་གཡོ་བར་བྱེད་དོ། །རྣམ་རྟོག་གིས་རླུང་ཇི་ལྟརསྐྱོད་དམ་ཞེ་ན། དཔེར་ན། འདབ་ཆགས་མཁའ་ལ་འཕུར་བའི་ཚེ་འདབ་གཤོག་བསྐྱོད་པ་ལས་རླུང་ཤུགས་འབྱུང་བ་དང་འདྲ་བར། སྐྱེས་བུས་རྣམ་རྟོག་ལས་བྱུང་བའི་བརྗོད་འདོད་ཀྱི་དོན་དེ་གཞན་གྱིས་གོ་བར་འདོད་པའི་ཤུགས་ཀྱིས་སྐྱོད་པའི་ཚེ། རང་གི་ལུས་ལ་ཁྱབ་པའི་རླུང་(བཱ་ཡ་ཏ)གི་རྒྱུ་བ་ཀུན་ནས་གཡོ་བར་བྱེད། དེའི་རྐྱེན་གྱིས་སྐྱེ་བུ་དེའི་ལྕེ་སོགས་བྱེད་པའི་རྐྱེན་རྣམས་གཡོ་ཞིང་ཡི་གེ་སྐྱེ་བའི་གནས་རྣམས་དང་ཕྲད་སྟོབས་ཀྱིས་བརྗོད་འདོད་ཀྱི་བརྡའི་སྐུལ་སློང་དང་མཐུན་པའི་ངག་གི་འདུ་བྱེད་དག་འབྱུང་བ་ཡིན་ནོ།། དེའི་ཚེ་ངག་གི་བརྗོད་པ་དང་ལྷན་ཅིག་དུ་འབྱུང་བའི་ཤྭཱ་སྭཱ་ཞེས་པའི་རླུང་ནི་ངག་གི་འདུ་བྱེད་ཀྱི་ལྷན་ཅིག་འབྱུང་བའི་རྒྱུ་ཡིན་ནོ།། ངག་གི་འདུ་བྱེད་དེ་ཉིད་ལ་ཁྱབ་པའི་དབྱངས་གསལ་རྣམས་ནི་ཀུན་འགྲོ་རྒྱུ་ཡིན་ཏེ། ཡི་གེ་ཐམས་ཅད་དབྱངས་གསལ་གྱི་རྗེས་སུ་ཀུན་ཏུ་འགྲོ་བས་སོ། དཔེར་ན། གཟུགས་མཐའ་དག་འབྱུང་བ་བཞིས་བསྐྱེད་པ་བཞིན་ནོ།།
སྐྱེས་བུའི་རྣམ་རྟོག་གི་སྣང་ཆ་ལས་རྗོད་བྱེད་ཀྱི་སྒྲ་དང་བརྗོད་བྱའི་དོན་གཉིས་འབྲེལ་བ་སྣང་བ། བརྗོད་བྱ་གདུང་འདེགས་ཀྱི་དོན་བྱེད་ནུས་པ་ལ། རྗོད་བྱེད་ཀྱི་མིང་ཀ་བ་ཞེས་གདགས་པ་དེ་དང་འབྲེལ་ནས། བརྡ་དུས་སུ་རྟོག་པའི་ཞེན་པ་ལྟར་མིང་བརྡས་སྦྱར་བ་ལ། ཕྱིས་ནས་སྐྱེས་བུ་རང་གི་རྟོག་ངོ་འཆར་བ་དང་འདྲ་བའི་མིང་གིས་འཇུག་པ་ན། དོན་དེ་ཉིད་མིང་ཚིག་དེའི་ངོས་སུ་མེ་ལོང་ལ་གཟུགས་བརྙན་བཞིན་འཆར་བ་ཡིན་ལ། འདི་ནི་ཡི་གེའི་སྐལ་མཉམ་གྱི་རྒྱུ་ཡིན་ནོ།། དཔང་ལོ་ཆེན་མོའི་ཚོགས་གསུམ་ལས། ད་ནི་ཡི་གེའི་རྒྱུ་བརྗོད་པ། བརྗོད་འདོད་དབང་གིས་རླུང་གཡོས་ཤིང་། དེ་ཡིས་གནས་དང་བྱེད་པ་དང་། རྩོལ་བ་བསྐྱེད་དེ་དབུགས་དབྱུང་དང་། ལྷན་ཅིག་ཡི་གེ་གདངས་རྣམས་སྐྱེ། །ཞེས་སོ། །སློབ་དཔོན་ཆོས་མཆོག་གིས། ངག་གི་དོན་སྣང་བའི་སེམས་པ་ལས་བརྗོད་འདོད་སྐྱེ་ལ། དེ་ལས་གནས་དང་བྱེད་པ་ཕྲད་ཅིང་དེ་ལས་སྒྲ་སྐྱེའོ་ཞེས་གསུངས་མོད་གནས་ཕྲད་པར་བྱེད་པ་ལ་རླུང་ཡང་དགོས་པར་གསལ་ལོ། ཐུན་མོང་མ་ཡིན་པའི་རྒྱུའི་དབང་དུ་མཛད་ནས། སློབ་དཔོན་ཆེན་པོ་ཙནྡྲགཽ་མིས་ཡི་གེའི་མདོར། གནས་དང་བྱེད་པ་དང་རྩོལ་བ་རྣམས་ལས་ཡི་གེ་རྣམས་སྐྱེའོ། ཞེས་གསུངས་སོ།།
 ཡི་གེའི་རྒྱུ་དེ་དག་བསྡུས་ཏེ་བསྟན་པ།
གནས་རྣམས་དང་ནི་བྱེད་པ་དང་།།
རྣམ་པར་རྟོག་དང་རླུང་གཉིས་དང་།།
ང་རོ་གསལ་བྱེད་སྣང་ཆ་ཡིས།།
ངག་གི་འདུ་བྱེད་ཀུན་ཏུ་བསྐྱེད།།
ཡི་གེ་འབྱུང་བའི་རྒྱུ་དེ་དག་བསྡུ་ན་ཡི་གེ་སྐྱེ་བའི་གནས་ཁོག་པ་སོགས་(འདི་དག་ལ་གཞིའི་རྒྱུ་ཞེས་ཀྱང་བྱའོ་)དང་།  བྱེད་པའི་རྒྱུ་ཕྲད་པ་སོགས་(འདི་དག་འབྱིན་པའི་རྒྱུ་ཞེས་ཀྱང་བྱའོ)དང་། རྣམ་པར་རྟོག་པ་(སྐུལ་བའི་རྒྱུ་ཞེས་ཀྱང་བྱའོ)དང་། བྱེད་པ་རྣམ་སྐྱོད་པར་བྱེད་པའི་རྒྱུ་རླུང་བཱ་ཡ་ཏ་དང་། ཡི་གེ་དང་ལྷན་དུ་འབྱུང་བའི་རྒྱུ་རླུང་ནི་(བཱ་ཡ་ཏ་དང་ནིཤྭཱ་སྭཱ་)གཉིས་དང་། ཀུན་ཏུ་འགྲོ་བའི་རྒྱུ་ང་རོ་བཅུ་དྲག་དང་གསལ་བྱེད་བཅོ་བརྒྱད། སྐལ་མཉམ་གྱི་རྒྱུ་རྟོག་པའི་ཞེན་སྣང་ལ་འཆར་བའི་ཕྱི་རོལ་གྱི་གཟུང་བའི་ཆ་ཡིས་དབྱེ་བ་སྟེ། རྒྱུ་བདུན་པོ་དེ་དག་ལས་ངག་གི་འདུ་བྱེད་ཀུན་ཏུ་བསྐྱེད་དོ།།

༩༽ཡི་གེའི་རྒྱུ་སོ་སོའི་ངོ་བོ་བཤད་པ་ནི།
རྒྱུ་བདུན་དག་ལས་འབྱུང་བ་ནི། །
གནས་རྣམས་གཞི་ཡི་རྒྱུད་ཡིན་ཏེ། །
བྱེད་པ་འབྱིན་པར་བྱེད་པའི་རྒྱུ། །
དེ་བཞིན་རྣམ་རྟོག་བསྐུལ་བའི་རྒྱུ། །
ཇི་ལྟར་ཤིང་ལས་རླུང་བཞིན་དུ། །
བྱེད་པ་སྐྱོད་རྒྱུ་བ་ཡ་ཏའོ། །
སྐྱེས་བུ་དང་ནི་བཞོན་པ་བཞིན། །
ལྷན་ཅིག་ཇའབྱུང་རྒྱུ་ནི་ཤྭ་ས། །
ང་རོ་རྣམས་དང་གསལ་བྱེད་ནི། །
ཀུན་ཏུ་ཁྱབ་པར་འགྲོ་བའི་རྒྱུ། །
སྣང་ཆ་འདྲ་བར་འབྱུང་བ་ནི། །
སྐལ་བ་མཉམ་པའི་རྒྱུ་ཞེས་བྱ། །
ཡི་གེའི་རྒྱུ་བདུན་ཏེ གཞིའི་རྒྱུ་གནས་རྣམས་དང། །འབྱིན་པའི་རྒྱུ་རྐྱེན་རྣམས་དང། སྐུལ་བའི་རྒྱུ་རྣམ་རྟོག་དང། སྐྱོད་པའི་རྒྱུ་རླུང་བཱ་ཡ་ཏ་དང། ལྷན་ཅིག་འབྱུང་བའི་རྒྱུ་རླུང་ནི༔ཤྭཱ་སྭཱ་སྟེ་དབུགས་དང། ཀུན་ཏུ་འགྲོ་བའི་དབྱངས་གསལ་ཉེར་ལྔ་དང། སྐལ་བ་མཉམ་པའི་རྒྱུ་རྟོག་པའི་ཞེན་ཡུལ་སྟེ་བདུན་ནོ། ། དེ་དག་གིས་ཡི་གེའི་རྒྱུ་བྱེད་སྟངས་ཀྱི་ཆ་ནས། ཁོག་པ་དང་མགྲིན་པ་ལ་སོགས་པ་ཡི་གེ་གང་ནས་འབྱུང་བའི་གནས་ལ་ནི་གཞིའི་རྒྱུ་ཞེས་བྱ་སྟེ། དཔེར་ན། དྲིལ་བུའི་སྒྲ་གང་ནས་འབྱུང་བའི་སྦུགས་སམ་ཁོག་དང་འདྲའོ། །རྐན་ལྕེ་སྦྱར་བ་དང། སོ་ལྕེ་སྦྱར་བ་དང། མཆུ་གཉིས་སྦྱར་བ་སོགས་ནི་འབྱིན་པར་བྱེད་པའི་རྒྱུ་ཞེས་བྱ་སྟེ། དྲིལ་བུའི་ལྕེ་དང་འདྲའོ། །ཀུན་སློང་གི་རྣམ་རྟོག་ལ་སྐུལ་བའི་རྒྱུ་ཞེས་བྱ་སྟེ། དེ་ནི་དྲིལ་བུ་བསིལ་བར་བྱེད་པའི་སྐྱེས་བུ་དང་འདྲའོ། །བཱ་ཡ་ཏ་ཞེས་བྱ་བའི་རླུང་ལ་སྐྱོད་པར་བྱེད་པའི་རྒྱུ་ཞེས་བྱ་སྟེ། དྲིལ་བུའི་ལྕེ་སྐྱོད་པར་བྱེད་པའི་རླུང་གི་ཤུགས་དང་འདྲ་བས་སོ། །བཞི་པོ་དེ་དག་ནི་རང་འབྲས་ཡི་གེའི་སྔ་རོལ་དུ་ངེས་པར་འབྱུང་དགོས་པས་སྐྱེད་བྱེད་ཀྱི་རྒྱུ་ཡིན་ལ། ནི༔ཤྭཱ་སྭཱ་ཞེས་བྱ་བ་ནི་དབུགས་ཀྱི་སྐད་དོད་ཡིན་ལ། དེ་འདྲའི་དབུགས་ནི་ལྷན་ཅིག་འབྱུང་བའི་རྒྱུ་ཡིན་ཏེ། ཡི་གེའི་སྒྲ་རྣམས་ནི་དབུགས་དང་རྐན་ལྷན་ཅིག་སྐྱེ་འགག་བྱེད་ཅིང་། དབུགས་ཀྱི་རྟ་ལ་ཞོན་པའི་ཕྱིར། དབྱངས་བདུན་དང་གསལ་བྱེད་བཅོ་བརྒྱད་པོ་རྣམས་ལ་ནི་ཀུན་ཏུ་འགྲོ་བའི་རྒྱུ་ཞེས་བྱ་སྟེ། འབྲས་བུ་འབྱུང་གྱུར་གཟུགས་གང་ན་ཡོད་པ་དེ་ན་རྒྱུ་འབྱུང་བའི་གཟུགས་ཀྱིས་ཁྱབ་པ་བཞིན་ནོ། །རྟོག་པ་ལ་དབྱངས་གསལ་གྱི་ཡི་གེ་དེ་དང་དེར་སྣང་བའི་ཤེས་རྣམ་ལ་ནི་སྐལ་བར་མཉམ་པའི་རྒྱུ་ཞེས་བྱ་སྟེ། ཡི་གེ་རང་རང་གི་རིགས་འདྲའི་རྒྱུ་སྔ་མ་ཡིན་པའི་ཕྱིར། དཔེར་ན་བྱད་བཞིན་དང་དེའི་གཟུགས་བརྙན་བཞིན་ནོ། ། འཇམ་མགོན་ས་སྐྱ་པཎྚི་ཏས ། དང་པོ་བཞི་སྔོན་དུ་འགྲོ་བའི་རྒྱུ་དང། ཕྱི་མ་གསུམ་སྐལ་བ་མཉམ་པའི་རྒྱུར་བཞེདདེ། སྒྲ་ལ་འཇུག་པ་ཞེས་བྱ་བའི་བསྟན་བཅོས་ལས། གསུམ་པ་རྒྱུ་ནི། གཉི་སལས་ཕྱ་བས་བདུན་འགྱུར་ཏེ། སྔོན་དུ་འགྲོ་བའི་རྒྱུ་བཞི་དང་། སྐལ་བ་མཉམ་པའི་རྒྱུ་གསུམ་མོ།། ཞེས་གསུངས།་དབུས་པ་བློ་གསལ་གྱིས་ནི། ཇི་སྐད་དུ། བཞི་ནི་སྔོན་དུ་འགྲོ་བའི་རྒྱུ། །ལྷག་མ་ལྷན་ཅིག་འབྱུང་བར་བཞེད། །ཡང་ན་རྣམ་རྟོག་ཉེར་ལེན་རྒྱུ། །ལྷག་མ་ལྷན་ཅིག་འབྱུང་བར་བཞེད། །ཡང་ན་རྣམ་རྟོག་ཉེར་ལེན་རྒྱུ། །ལྷག་མ་ལྷན་ཅིག་བྱེད་པར་ཤེས། །ཞེས་བཤད་དོ། །
སྐབས་འདིར་པཎ་ཆེན་ཤཱཀ་མཆོག་པས། དེ་ཡང་འདི་ལྟར་ཤེས་དགོས་ཏེ། ཡི་གེ་དངོས་ནི་རྣམ་པར་རྟོག་པ་ལ་དེ་དང་དེར་སྣང་བའི་ཤེས་རྣམ་ལ་བྱ་ལ། དེ་ལས་གཟུགས་བརྙན་གྱི་ཚུལ་དུ་བྱུང་བའི་སྒྲ་ཉན་ཤེས་ཀྱིས་ཐོས་པ་དེ་ནི་ཡི་གེའི་གཟུགས་བརྙན་ནམ་འབྲས་བུ་ཡིན་གྱི། ཡི་གེ་དངོས་མ་ཡིན་ནོ། །དེ་ལྟར་ན་ཡི་གེ་དངོས་དང། དེ་ཀུན་ནས་སློང་བའི་རྟོག་པ་དང། ཡི་གེ་དེའི་འབྲས་བུར་གྱུར་བའི་སྒྲ་ཉན་ཤེས་ཀྱིས་ཐོས་པ་དང་གསུམ་མོ། །དོན་དེ་ལ་དགོངས་ནས། ཡི་གེ་ཀུན་སློང་ཤེས་པ་ལས། སྐྱེ་ལ། ཞེས་དང་ཤེས་པས་སྒྲ་སྐྱེའོ། །དེ་ཡི་ཁྱད་པར་ཅན་དེ་ནི། །སྣང་བས་ངེས་པར་འགྱུར་བ་ཡིན། །ཞེས་གསུངས་སོ། །དེ་ལྟ་མོད་ཀྱི་གཞུང་འདིར་ནི་ཡི་གེའི་འབྲས་བུ་ལ་ཡི་གེར་བཏགས་ནས། ཡི་གེ་དངོས་སུ་འཆད་རྒྱུ་དེ། །སྐལ་བ་མཉམ་པའི་རྒྱུ་བཤད་དོ། །ཞེས་གསུངས།


[1] སྙན་ངག་ཁམས་འགྲེལ་ལ་ས། རྒྱ་གར་ལ་ངེས་ཚིག་གི་བཤད་པ་ཡོད་པར་འདོད་ནས་བཤད་ཚུལ་མི་མཐུན་པ་མང་པོ་བྱས་པ་དང༌། ཡང་ངེས་ཚིག་མེད་པར་འདོད་རྒྱལ་གྱི་མིང་དུ་སྨྲ་བ་སོགས་མང་ཡང༌། སྤྱིར་ནི་ཕྱི་མ་ལྟར་ལེགས་ལ། འོན་ཀྱང་ངེས་ཚིག་གི་བཤད་པའི་དབང་དུ་བྱས་ན། རྒྱ་གར་བ་རྣམས་ཆ་ལུགས་གོས་ལ་སོགས་པ་ཡང་དཀར་པོ་ལ་མཆོག་ཏུ་འཛིན་ཞིང༌། ནག་པོ་མྱ་ངན་གྱི་གོས་སུ་བྱེད་པ་དང༌། རྒྱ་ནག་པ་དེ་ལས་ལྡོག་པར་བྱེད་པའི་ལུགས་ཀྱིས་དེ་ལྟར་བཏགས་པ་ཡིན་ཞེས་བཤད་ནའང་རུང་བར་རྗེ་བླ་མས་བཞེད་དོ། ཞེས་གསུངས།
[2] ཁམས་འགྲེལ་ལས།
[3] ཡི་གེའི་སྦྱོར་བ། རྗེ་ས་པཎ་གྱིས་མཛད་པ།
[4] ཚོགས་གསུམ་གསལ་བ། དཔང་ལོ་ལོ་ཙ་བས་མཛད་པ།